政府地產商一片大合唱聲中，房屋協會（房協）宣布業績，去年度嘅營運盈餘跌六成，減至四億八千六百萬元，今年仍會繼續下跌，主要原因就係政府唔准房協賣夾屋貨尾之故。政府既然暫停售出居屋，夾屋亦一視同仁，以後都唔知點樣脫手。政府出招托市，私人地產發展商得到最大益處，房委房協係輸家，房委會分分鐘出現財赤，房協好彩底子厚，現金都有八十三億，重可以捱得住。
房協宣布業績之日，報紙圖片只見到房協主席鍾瑞明同埋副總幹事王麗珍，唔見總幹事蘇慶和出鏡，點解VictorSo唔見咗人呢？有老友記話畀左丁山聽，蘇慶和幾個月前已經辭職，十月二號就去新鴻基報到，所以不便出席業績發布會咯。域陀在房協嘅最後一天係九月二十七號，星期六去西安行街睇古迹，係咁意放三日假，十月就轉新工。聽講新鴻基地產會派域陀睇中國地產，上海廣州都關佢事。
現時做半官方機構或公共機構嘅行政阿頭，並非易事，一來易俾傳媒追蹤，二來人工高，會俾人彈，香港地大把人患上眼紅症，憎人富貴（鬧人哋人工高）厭人窮（鬧宣揚綜援養懶人），啲阿頭真係動輒得咎，如果有料有把炮嘅話，打私人機構工只會有老闆壓力，冇公眾壓力，人都精神啲健康啲。並唔係話私人老闆唔會鬧死人，不過閂埋房俾老闆鬧，好過俾報紙電台日日鬧啩？