容祖兒（Joey）最近被指體形肥胖了不少，前晚她錄影《勁歌金曲》時，特別穿上白色透視衫和黑色長褲，不知是否想以黑褲掩蓋胖軀呢？不過Joey已表明自己要爭氣，必須積極減肥。
容祖兒、葉蒨文、羅嘉良、黃家強及陳司翰等，前晚在清水灣無綫電視城錄影《勁歌金曲》，兩位女司儀陳松伶及嘉碧儀身穿短裙和牛仔靴，十分搶鏡。而容祖兒不知是否怕被人取笑她肥胖，所以特別穿上黑色長褲，上身則襯以一件透視白色衫。
Joey前晚唱了一首新歌《爭氣》，她說：「呢首歌其實係講失戀嘅，因為我公司有個同事失戀，所以呢隻歌就咁誕生喇！不過我自己都要爭氣減肥囉！呢幾日我都知羅文入咗醫院，我都諗住過幾日會打電話畀佢，中秋節我見佢精神都唔錯，所以我相信佢會冇事。」
葉蒨文前晚帶同兩隻愛犬入錄影廠，她說：「我好錫呢兩隻狗，但𠵱家香港有好多地方都唔可以帶狗出入，所以我都想盡量搵時間陪佢哋。佢哋都好醒，早排有一晚兩隻狗吠得好緊要，初時我以為有賊，後來我先知佢哋發現有曱甴，佢哋都好識保護我。呢排我同老公都好忙，特別係我老公，因為佢要搞個唱，我約佢都要同佢助手度期呀！」
此外，對於黃貫中（阿Paul）早前批評政府有關《基本法》第二十三條一事，黃家強表示十分贊成阿Paul的看法，他說：「呢個咁嘅時勢，政府應該諗吓點幫市民，而唔係不斷去畀壓力市民。」
採訪：卓寶花 攝影：陳志嵐