喺今屆法國巴黎車展上，各大車廠紛紛展出旗下新車，以吸引車迷注意；就連愛快亦唔例外，於會場內展出全新147GTA跑車。新車不但造型具有濃烈跑車氣息之餘，一台3.2公升V6偈亦能迸發出強勁馬力輸出，難怪令在場不少車迷為之嘩然。
或者大家會問，究竟147GTA同普通版嘅147喺外表上有何分別呢？雖然兩者造型相近，但當細心留意下，唔難察覺到147GTA除用上三門設計外，頭尾泵把及氣霸改換上跑車化設計，加上車高有所下調，以及響四輪17吋跑車合金胎軨襯托下，絕對能夠將其高性能跑車形象展示出來。
車廂布局與現有147型號一樣，除空間來得寬敞舒適之餘，設備配搭亦見齊全易用；至於引擎配搭方面，廠方則會為其裝上一台3.2公升V6引擎，動力輸出充裕之餘，加上一套經過強化嘅懸掛系統（前輪雙搖臂、後輪麥花臣支柱），響多套電子系統如TCS等等，以及225/45R17輪胎配搭嘅輔助下，可予人有頗佳嘅路面循迹性㗎。