師奶球迷義助港隊

師奶球迷義助港隊

今次南韓搞亞運,承繼咗世界盃搵自己友扮外國球迷嘅優良傳統,喺入座率唔高嘅比賽項目(如籃球),確可以起充撐場面作用,但係唔該專業啲,連橫額都掛錯就真係笑大人個口。

港打氣橫額倒轉掛
睇過香港隊足球同籃球兩場比賽,發現每場比賽都有幾百球迷入場為香港打氣,初時以為係香港旅行社嘅亞運釜山團,但睇真先發現呢班球迷全部有共通點,就係個個都係「阿豬媽」(即南韓師奶)。
噚日香港男籃贏科威特一場波,就全靠呢班冒牌球迷落力打氣,佢哋帶埋鑼鼓、大旗小旗、橫額(可惜最後倒轉掛),香港隊打波佢哋全場冇停過;睇見咁大年紀嘅球迷都咁努力,小記一於採訪之餘,都幫手打氣。

揭幕式令觀眾陶醉
講開南韓觀眾,佢哋嘅投入感真係冇得頂,好似噚日開幕禮,大會特別準備一對木製手掌畀入場觀眾,免得佢哋因為節目太精采而拍爛手掌。另外,每名觀眾同時得到螢光棒一支,喺成個球場熄晒燈情況下,每個觀眾揮動螢光棒一刻,加埋柔揚音樂伴襯,真係好感動㗎。