名店Sales「威化Q」屬時下靚女一名，打扮與口味同樣出眾，成身名表名袋，加埋細細部嘅名車，雖然全部係名牌初階，但加埋都要幾十萬。做佢哋名店Sales最緊要講行頭，呢份工實在啱佢，威化Q每日又可在名店出入，令佢覺得高人一等。
不過「威化Q」呢排終於面露愁容，原來老細不斷有壓力，要求威化Q谷生意，問威化Q乜佢哋生意好差咩，威化Q：「生意不知幾好，咁嘅巿道，每個月仍然有錢賺，生意額同往年一樣，冇話急跌，可惜老細呢排忽然身痕，要求我哋同人哋看齊啫。」
同邊間名店看齊咁巴閉呢？威化Q答案令人打個突：「最近中環名店都流傳緊，日本嗰邊直角V新店開張，單日生意額竟然做咗一億，唔係Yen，係港紙一億！老闆話我哋雖然重係賺緊錢，但唔夠人哋多，要學吓人哋喎。」
報道話日本直角V新店第一日開張，已有人排三晚通宵為掃限量貨，相信有過千人幫襯，計落只要每人幫襯三兩萬就可砌夠一億生意額，喺直角V買兩三萬貨實在唔難，所以呢個傳言並非冇可能。
如果屬實，咁香港實在玩完，地產商好辛苦催谷新盤都只做兩三億生意一日，人哋賣手袋竟輕而易舉一日做過億生意。唔怪得「威化Q」不斷話已執包袱準備轉工。
主持人：大食Jack
八卦熱報：