謝霆鋒的前女友盧巧音，二人分手後再見亦是朋友，她知道霆鋒近日鼻敏感及哮喘病復發，這幾天都「閉關」，故盧巧音日前跟徐濠縈和劉浩龍往其裕景花園寓所探病，四人還在家中傾偈、打機和吃大閘蟹。
盧巧音前晚在尖沙嘴舉行小型音樂會，她在現場大唱《好心分手》時，fans大聲和唱，盧巧音頓時感動得哭如淚人，場面感人。
盧巧音的前男友謝霆鋒被控串謀妨礙司法公正案件將於後日判決，她日前相約了徐濠縈和劉浩龍到霆鋒位於裕景花園的寓所探訪。盧巧音前晚說：「我嗰晚去探病啫，因為霆鋒鼻敏感同哮喘，我哋嗰晚重同佢一齊食大閘蟹。」問到張栢芝是否亦是座上客？盧巧音說：「嗰晚只係我、劉浩龍、徐濠縈同霆鋒，我哋都係想輕輕鬆鬆，作為朋友唔會提嗰件事，佢（指謝霆鋒）咁大個人會有分數。總之嗰晚，男嘅就打機，女嘅就吹水。」
問到盧巧音當晚為何到霆鋒家時表現閃縮？她解釋說：「我費事俾人誤會係另一個人，其實我嗰晚亦都帶咗一啲figure公仔去畀霆鋒玩。我哋朋友之間互相鼓勵。」對於王菲加盟新力唱片，盧巧音表示十分歡迎，她說：「我哋都冇牴觸，Sony係一個大家庭，況且我拍馬都追唔上阿菲。」
而盧巧音前晚在演唱會上哭到連睫毛液都溶了，成為「花面貓」。問到盧巧音是否因為歌詞內容跟她與余文樂分手相似，一度感觸流淚？她說：「我係感動，因為歌迷咁錫我，唔係感觸。」
盧巧音前晚亦憑《好心分手》獲卡拉OK頒發「2002卡拉OK金曲金獎」，據知這首歌的點播次數高達八十萬次，她說：「我冇諗過咁受歡迎，去街重聽到啲人用佢嚟做電話鈴聲。」
此外，昨晚盧巧音和張栢芝均有到無綫出席「勁歌金曲第三季季選」，兩人在後台相遇時，沒有打招呼，完全當對方透明。
採訪：李珮洳
攝影：何國豪