張栢芝日前自嘲為「失戀皇后」，與她曾傳緋聞的陳小春最近的新歌又名為《失戀王》。小春昨日指栢芝在玩其新歌，更暗寸對方熱戀中，「點會失戀！」栢芝昨晚戴上十四萬多元的卡地亞戒指亮相《勁歌》季選，不過她與小春及前男友陳曉東卻無緣碰頭。
張栢芝早前曾表示若陳小春邀請她做其明年元旦舉行的演唱會嘉賓，自己必會出席，昨日小春在修頓球場出席《跳繩強心展繽紛》活動時被問到此事時，小春竟說：「諗吓先，𠵱家重度緊，可能請佢做主持人，佢咁識講嘢。」
栢芝日前又自嘲為「失戀皇后」，難免令人聯想到其前緋聞男友陳小春的新歌《失戀王》，小春聞言又暗寸栢芝：「佢點會失戀呀！佢熱戀中，佢玩我隻歌啫，佢咁係取笑我，取笑全世界。全城都知佢熱戀中啦。失乜嘢戀？皇乜嘢后吖？我呢首歌唔係因為呢件事（指栢芝），唔好拉咁遠。」
昨晚栢芝本應會與陳小春及陳曉東同場，在《勁歌》第三季季選出現，但三人始終十分巧妙地無緣碰頭，反而栢芝卻與曾傳不和的梁詠琪合照。而栢芝昨日憑《真我工作坊》獲《勁歌》第三季季選「最受歡迎廣告歌曲獎」。
栢芝與小春分別現身電視城一廠化妝間，但二人卻相隔甚遠，記者問小春是否願與栢芝合照，他以化妝為由推掉，栢芝更說：「佢冇問題，我冇問題。」可惜小春在唱歌後即走到餐廳，栢芝表演後又急急離場。栢芝在八時零五分離開，原定於八時到場的東東則到八時十五分才出現，結果三人仍緣慳一面。東東自稱因趕錄音及發燒而遲到，到場時還反問栢芝是否已走，他說：「唔使緊張，冷靜啲，我都想見到佢，大把機會啦。」然而東東和小春兩人則大方合照。
對於小春暗寸自己不是失戀皇后，栢芝說：「我唔知，我唔講。」其身邊的助手打圓場表示栢芝趕着入廠，栢芝則𤷪𤺧地說：「我唔係趕住入廠，只不過呢啲嘢我話咗唔講就唔講啫！」至於有消息指霆鋒所戴的密宗戒指，是栢芝所送，栢芝說：「冇，我冇送過呢啲嘢。」
昨日栢芝戴上一隻價值十四萬多元的卡地亞豹形戒指，問她是否自己買？她反應甚大地說：「唔通人哋送咩？梗係自己買。我第一眼見到呢隻戒指就好鍾意。」記者再問是否狄波拉（拉姑）送，栢芝重複說：「我真係自己買㗎！唔信你哋問卡地亞啲人啦，有record㗎！」
有記者告知栢芝東東不介意和她合照，栢芝說：「我唔係避，呢啲嘢真係唔想講太多，不過我收到風，人哋冇咁講喎！」
問到栢芝近日是否陪伴霆鋒，她說：「初頭睇啲新聞幾份一樣，𠵱家冇新聞，就搵啲新聞挖出嚟講，霆鋒啲嘢唔講啦。」
而陳曉東昨午在尖沙嘴出席商台一個戶外直播訪問，問到晚上跟舊愛張栢芝同場到電視城參加《勁歌》季選頒獎禮，可怕碰面時會尷尬，東東說：「唔會，我哋分咗手成年都冇見過，但都有傾電話，唔記得傾啲乜。」
採訪：李珮洳、卓美娟
攝影：陳烱威、黃文成