楊恭如同上海富商周正毅傳出緋聞都已經有一段日子，早排楊恭如成日走出嚟講周正毅，似乎好想畀人知道佢兩個嘅非一般關係。
不過周正毅最近又出嚟話唔想提楊恭如，又話唔希望俾人破壞家庭幸福，對於楊恭如自爆同佢自細就認識一事，周正毅就話有人講大話！去到呢個地步，雖然楊恭如仍死撐話唔信周正毅會咁冇風度，但前晚周正毅又高調咁帶老婆毛玉萍去美國拉斯維加斯旅行，睇嚟毛玉萍同楊恭如之間嘅一場「爭奪戰」，輸贏已有定局。
前晚大約九點，周正毅同毛玉萍約咗幾個朋友一齊去美國玩，上機前周正毅俾記者追問佢同楊恭如嘅緋聞，佢笑笑口話冇嘢講。相反毛玉萍就肯同記者傾偈，佢話今次去美國會逗留一個星期，對於佢老公話唔想提楊恭如，毛玉萍聽到呢個名即時面黑，跟住話：「呢啲嘢最好問番周生，我只知老公一向都幾錫我。」
麥家琪、李蘢怡、曾志偉同邱淑貞（豆斗）及沈嘉偉兩夫婦等，日前去咗上海出席東方魅力旗下一間時裝店嘅開幕典禮。一眾嘉賓之中，以麥家琪着得最性感，佢以一條低胸裙現身，成為全場焦點。
豆斗老公沈嘉偉都係做時裝生意，對於今次出席東魅旗下時裝店嘅開幕活動，豆斗話：「冇話同行如敵國，我都希望大家好。」早前有傳豆斗有喜，佢笑住咁話：「係咪我食得飽呀？大家誤會咋！」有傳豆斗同老公結婚三周年，沈嘉偉將會送限量法拉利跑車畀嬌妻，豆斗即時否認，但佢表示最近的而且確是收到老公送嘅新車。
台灣天后個前度花弗男友，好多年前同香港大姐大傳緋聞呢單嘢，相信唔少人都聽過，但係馮仁昭最近八到，佢同飲食業名媛原來都有一手。話說呢位港姐出身嘅名媛，多年前同老公離婚之後，成日去酒吧搵人解悶，結果識咗台灣天后個花弗男友，不過佢哋只係維持咗幾個月就玩完，如果唔係曾經俾馮仁昭個老友撞到佢哋一齊，真係冇乜人知。
陳穎妍同蔡曉儀噚日去咗九龍城廣場行花生騷，而姚樂怡就擔任司儀。蔡曉儀獲安排穿上大露背裝同真空上陣，出場即大受歡迎，有不少歡呼聲支持。蔡曉儀話今次係最突破性演出，佢話：「我最近拍咗個纖體廣告，所以咪性感啲囉，我已經做足預防措施。以前我思想比較保守，不過𠵱家要大得大，要細得細，自信增加唔少。」纖體後蔡曉儀重有機會拍寫真，佢話考慮緊會唔會接，因為要問准阿媽。
黃伊汶（Dior）噚日到天水圍出席新城「求Fun野外賽」活動，重同九對愛侶一齊玩遊戲。Dior玩捉魚遊戲時十分投入，重幾乎跌咗落水，佢話遲吓會去日本進修音樂同跳舞一個月，今次決定唱片公司同經理人都好支持，不過學費同生活費加埋都要六位數字，好彩公司幫Dior預支住學費先。
日本偶像組合V6嘅兩位成員井之原快彥同長野博，噚日由日本抵港，宣傳十一月舉行嘅演唱會，近一百五十名忠實fans到機場迎接偶像，重將佢兩個包圍。佢哋兩個噚日亦為《2002年勁歌金曲第三季季選》綵排，長野博喺記者會上重講笑咁話：「我哋以為冇人嚟接機㖭！」