張栢芝日前在港出席她主演的電影《我家有一隻河東獅》之首映後，原定要緊接在二十七日至三十日分別到上海、成都及杭州宣傳《我》片，但有內地報道指栢芝在宣傳首站上海玩失蹤，懷疑她因陪伴男友謝霆鋒才失場。
對於上海失場一事，她理直氣壯地說：「我由始至終都冇應承過，冇度過期，係對方一廂情願話度咗期，呢隻貓我食硬，內地啲人覺得我玩失蹤，呢單嘢啲人第一次聽已經入晒腦，會覺得我係呢啲人。」
栢芝續說：「𠵱家係對方當我去，就周圍同人講，但個期、精神上又未安排好，又冇問過我張栢芝，就周圍同人講。就好似話我開演唱會，但連我都未知，就周圍賣飛，面對壓力係我自己，錢就人哋袋。」
此外，栢芝所開的A6時裝店最近暫停營業，栢芝揚言店舖只是改裝為排舞室，供她的兩位弟弟學舞。她說：「間舖係裝修，拆晒啲嘢啫，唔會執笠，我張栢芝唔係末路，重有租交。間時裝店冇蝕，收支平衡，因為租好平，唔使一萬蚊。我兩個細佬鍾意跳舞，我咪裝修做排舞室，等佢哋排下舞囉，或者租畀人，搵老師番嚟教學生跳舞。」