今次好多國家喺開幕禮進場時都別出心裁，好似菲律賓選手一進場就打開紅藍黃三色雨傘，令人耳目一新，蒙古、印度等選手就穿起民族服裝，都幾有心思；相反中、日、韓等大國，只「老正」地穿西裝進場，新意欠奉。
講番香港隊進場，擔任香港持旗手嘅許長國（Sunny），在保齡球壇身經百戰，但「揸旗」就難倒佢；Sunny可能太緊張，只識揸住旗桿企定。當時又冇風，區旗好似頭耷耷，對比中國隊大旗手李楠不斷揮舞國旗，威風得多啦。
到聖火傳遞，由十幾位南韓體育運動員負責，最受歡迎始終係世界盃打入四強嘅足球隊成員，由隊長洪明甫持火把，金泰映、柳相鐵、李敏成同金秉址陪同，全場掌聲四起，不過去咗日本搵銀嘅靚仔前鋒安貞煥冇份，就有點失望。