喺今屆法國巴黎車展上，備受全球車迷注目嘅新一代英國賓利Coupe跑車，其神秘面紗終被揭開，而且重被定名為ContinentalGT(前稱GTCoupe)㖭；新車造型與當時仍在測試嘅概念型號相近，一台6.0公升W12Twinturbo引擎更可迸發出強勁馬力輸出。不如趁新車響10月8日抵港作首展前，一齊嚟先睹為快啦。
全新ContinentalGT跑車嘅造型，與當時仍屬測試階段嘅概念型號相近，同樣以極具流線型嘅車體設計出現，再響車頭四盞圓燈、闊大鬼面罩、19吋跑車合金胎軨，同埋闊大雙出式尾喉襯托下，一派高性能跑車形象表露無遺。
至於車廂方面，ContinentalGT仍貫徹有賓利汽車傳統嘅豪華氣派，除可容納四名乘客外，當然唔少得重有承托力極高嘅真皮座椅、把持感十足嘅跑車軚環、瑰麗豪邁嘅桃木裝飾等等，都能夠烘托出一份豪邁氣派。除此之外，車上共八個嘅安全氣袋及充氣簾幕組合，亦能充份保障乘客嘅安全。
據廠方公布嘅數據顯示，新車所配用嘅一台6.0公升W12Twinturbo引擎，馬力輸出達500匹，匹配一套6前速自動波箱，無論起步加速都有敏捷嘅表現；難怪新車可於5秒內完成0至100公里嘅加速，而極速更高達290km/h咁快啦。由前輪雙搖臂及後輪多連桿所組成嘅懸掛系統，以及有ESP等電子系統輔助，亦能令新車有出色嘅循迹表現㗎。
一直備受用家追捧嘅豐田Corolla，自於年前推出以來，經已有一段時間，故廠方最近特別為其推出Facelifted新版，以爭取更高之市場佔有率。
Facelifted新版造型大致上與現有型號相近，除改換上全新鬼面罩外，全新頭燈匹配霧燈組合，透光率較前提升不少，以增強晚間行車時嘅安全性，就連一組尾燈亦經過重新編排，賣相因而變得更吸引。
車廂布局則與現有型號相近，仍以寬敞舒適為賣點，當然唔少得承托力十足嘅座椅，以及齊全車廂設備配搭啦。引擎配搭方面，則仍以一台編號為1NZ-FE嘅1.5公升直4DOHC引擎作主打，除動力輸出充裕外，加上有豐田獨有嘅VVT-i系統輔助下，更可有低耗油量嘅特性㖭。據聞代理方面快將引入Facelifted新版Corolla抵港，有興趣嘅朋友就要留意我哋日後嘅試車報告喇。