如果睇戲有番咁上下年資，應該都認得出呢套係由辛康納利主演嘅經典之作──《魔宮傳奇》；想當年佢俾香港某英文台播完又播，就算幾好戲都變成「英語殘片」啦！不過呢幾年想睇番，又等極都未有DVD碟出，真係激死！
近排行開深水埗DVD舖，竟然俾筆者發現佢有DVD碟出（$135）；據稱，呢套舊片今次係首度以DVD碟（全區碼）格式推出，片長130分鐘，聲畫都重新以數碼技術處理過，聲效有齊DOLBYDIGITAL5.1聲道輸出，當然正好多！不過可惜並無中文字幕，如果遲啲出埋中文版就最好喇！
送MiniGame又包MTV
又係電腦動畫嘅世界，筆者最近攞起隻《至叻少爺占VS外星客》落DVD機玩，原來裏面收藏咗7隻MiniGame㗎！如果睇完碟就咁收埋佢就算，就真係大損失囉！另外，DVD碟內的Bonus部份，重收錄咗《KidInAmerica》同《LeaveUpToMe》兩隻MTV，以$128嘅碟價有咁多嘢玩，真係買得過！
十月初登場
據碟場探子回報，隻新版《E.T.外星人》將會喺10月第二個禮拜，推出3區版DVD影碟；江湖中傳聞，今次呢隻《E.T.外星人》將會以孖碟裝設計，一隻係舊版，另一隻就係全新加長版，不過資料有待進一步證實！至於價錢方面，估計此碟價約$130，都唔算太貴，有興趣一定要昅實。