一套《怪獸公司》，連續數星期成為DVD場熱賣榜冠軍，掀起了DVD界一片動畫熱，今個星期又有新動畫上場，就係有「韓國宮崎駿」之稱嘅李成彊名作《美麗密語》。如詩如畫的畫風、離奇虛幻的國度，再加一個美麗動人的愛情故事，的確予人別樹一幟的清新感覺。
記者：朱崇德 攝影：黃子偉、朱崇德
《美麗密語》剛在暑假上映，落畫個零月就已經推出3區DVD。製作此片的導演李成彊大有來頭，自95年起製作了13齣動畫，共獲得了11個動畫獎項，這套《美麗密語》更得到2002年法國安（Annecy）動畫節最佳動畫，被人稱為「韓國宮崎駿」。
《美麗密語》大部份動畫製作都是交由《Flash》及《Illustrator》一類普通電腦繪圖軟件完成，場景有如一幅幅用水彩淡掃的插畫，人物以精簡的線條來表達，睇慣了美國的電腦動畫和日本標榜細膩的手繪畫，再睇番現在的《美麗密語》，感覺特別清新。
根據美國官方網站資料，《蠍子王傳奇──盜墓迷城外傳》DVD碟應該要10月1日先至公開發售，唔知點解香港碟場今個禮拜竟然有1區新碟返。故事講述五千年前的古埃及，蛾摩拉城暴君要清除流散於沙漠的遊牧民族，用魔法殺害平民，最後各部落聯合反擊，聘請專業鬥士馬提亞斯（丹歷莊遜飾）來消滅這個幕後下咒的女魔法師。基本故事內容同戲院版冇乜分別，一樣係92分鐘；Bouns片段都係大路嘅製作特輯，唯一可取係多咗段《IStandAlone》MTV，算係有所交代。
由BBC出品嘅《宇宙無限》（SPACE），曾經喺英文台播過，以大量電腦動畫解釋宇宙點樣由「大爆炸」產生、探索宇宙可有其他生物存在、黑洞的形成及威力等，簡直係一本活動天文學教材。今次以孖碟裝推出，片長190分鐘，16:9的闊銀幕比例，聲畫表現俱一流，中文字幕重細分為香港、台灣同簡體三種，天文術語繙譯得好專業，最緊要係價錢平，呢類影片多數要幾百蚊，𠵱家百零蚊買到，好抵！
必睇Bonus
Disc2的「宇宙小常識」，會用文字講解有趣天文小知識，「相片集」還收錄了片內的靚靚CG宇宙圖片，值得一看。
售賣點：
DVSHOP（21949100）
深水埗福榮街107號舖