嚟到釜山亞運會，滿以為可以專心採訪各國選手在競技場上公平較量，點知港乒女將中有三位前中國球手資格出咗問題，搞到滿城風雨，連累小記兩日來被呢單羞家新聞煩住，心情認真麻麻。
講真，球員參賽資格嘅嘢，應該喺各總會管理層的專業工作，一唔應該博懵，二更唔可以走法律罅；前港協暨港奧委會會長沙理士在亞奧理事會公布完結果後，向記者爆咗一句好精警嘅，佢話，亞運精神係公平競技，若果帶埋律師嚟亞運會，挑剔條例，啲風度就蕩然無存嘞！
原來沙翁見到有港乒總有高層帶埋律師嚟到，對條例篤到實，當然唔高興。話時話，呢單嘢唔單止沙翁睇唔過眼，我哋做記者都蒙羞，嗰班外國記者見到「中港一家親」搞到球員資格唔清唔楚，𠵱家嘅決定就更貽笑大方，唔成為國際體壇笑柄才怪。
好心乒總同港奧委搞清楚啲條例同埋明確執行，唔好「偷雞」嘞，因為受害嘅始終係運動員！大路啲打好成績才會受到各方尊重。