首位華人諾貝爾物理學獎得獎者楊振寧教授八十大壽，中文大學噚日特別為楊教授搞咗一連串慶祝活動，一班中大物理系學生重送咗張生日卡同一幅寫上「博文約禮」嘅牌匾畀楊教授，令佢笑逐顏開。
喺朝早嘅「楊振寧八秩榮慶學術研討會」上，楊教授同一班著名學者，好似丘成桐咁，為在場三百名師生發表有關物理學嘅演說，重有唔少中學生慕楊教授大名而來。雖然部份出席嘅學生認為演說內容太深奧，「唔係好明」，但係能夠同楊教授近距離見面，已經好開心，重大讚楊教授好有威嚴。中大校長金耀基就話，楊教授就有如一本厚書，唔係齋睇封面就明書嘅內容，要好細心解讀同研究先得。
（圖）學術研討會一完，就有學生搵楊教授傾偈。 陳亮華攝
傳真︰2623-9278
電郵︰