喺風和日麗、秋意微涼嘅周末，八方最想就係出外吸收吓新鮮空氣，可惜唔得。特首老董同佢班問責高官就好啦，噚日可以一齊喺禮賓府，對住塊靚草皮歎世界。特區新班子𠵱家每隔個禮拜六都去禮賓府開所謂嘅「集思會」，但可能只係大家聚埋飲杯茶食個包。傾啲乜？對唔住，八方打聽唔到，亦唔敢去打聽。
冇辦法啦，𠵱家政府要搞二十三條立法，葉劉噚日先講開竊取國家機密，總之「未獲授權」披露官方機密資料就犯法，集思會喎，咁多秘密，邊個敢問，邊個敢聽呀？
噚日集思完，特首、司長、問責局長、常任秘書長、行政會議成員夾夾埋埋二十幾人，就只得曾鈺成走之前招呼記者兩句，話集思會傾過政府施政大方向，其他就問特首辦主任林煥光，或者新聞處長蔡瑩璧啦！
個個咁口密，好似要為二十三條向公眾示範咁，八方第日咪冇嘢好做？諗落都唔係嘅，除咗等坐監之外，最多第日咪寫多幾隻字，將政府四圍放風嘅政府消息，寫做「已獲授權但不能披露身份的政府消息人士」囉！
傳真︰2623-9278
電郵︰