上個禮拜三個市特別奇怪，明明要勁跌嘅，但最後都唔係好跌，原來都係「歸功」董特首喺個午餐會度放風，話好快會推出打救樓市嘅鴻圖大計。好多有去個午餐會嘅芬佬，當日下晝返到公司就唔聲唔聲咁喺度收地產股，有啲做芬嘅朋友重話，佢哋已經差唔多平晒之前地產股嘅沽空盤，重調轉頭沽番啲地產Put出嚟，博啲地產股跌唔番落去。
今次董伯伯咁高調出嚟講嘢，相信都係俾早前啲地產商針對式搶居屋客所致，為咗唔想攬住齊齊死，就惟有作出讓步。
另一單上周三發生嘅新聞就係，跌至接近1毫子嘅海爾中建（1169）喺星期三朝早開市升一成八後即刻停牌。
今次停牌好似話係同海爾要爭做「大婆」有關，今次若果真係可以攞番個話事權嘅話，對隻股嘅前景好有幫助。有個朋友同伏勝講，有人喺星期二已經周圍同人講話海爾要做大股東，叫人有買趁手，但由於佢喺股壇嘅聲譽麻麻，所以無乜人理佢。有班炒友聽到隻1169停咗牌之後，就部署緊復牌時點炒隻股，話如果真係有海爾注資嘅話，絕對可以炒到去兩毫子。
有個朋友之前同伏勝話過要留意隻意科控股（943），雖然隻股上周一公布嘅業績差得好緊要，不過個朋友話間嘢就嚟會有新轉機，皆因公司喺度搞緊啲新嘢。隻股仔喺公布咗業績之後，個價果然升上嚟，而且成交額重多番啲。至於係啲乜？咁就真係唔知，伏勝之前都有聽過佢哋搵過本地部份做物流嘅公司，想搞國內物流業，不過最後都係傾唔埋。今次佢哋又話會有嘢搞，真係唔知係乜傢伙，至於買唔買，就要睇你信唔信佢哋啦。
伏勝