去年十月海洋公園大搞鬼屋等萬聖節活動，搞到全城沸騰，今年佢哋再接再厲，投資超過2500萬舉辦《海洋公園十月全城哈囉喂》活動，重玩足一個月。其中以美國環球片場特許嘅《蠍子王魔域迷城真人Show》最有睇頭，以古埃及嘅鬼魅橋段挑戰你嘅膽量同心臟負荷量，再加埋《密室凶靈》及《魅影驚魂路》等鬼魅活動，自問膽識過人，又想應節搞「鬼」的話，你又點會錯過呢個練膽量嘅好機會呢？
記者：區佩嫦
攝影：林栢鈞
ImageBoy&Girl：Otto、Kelly
伸手不見五指嘅骷髏徑，絕對係最驚嚇嘅場景，窄窄嘅通道兩旁布滿幾百個面目可憎嘅骷髏骨頭，最攞膽係通道嘅強光射住雙眼，再配合煙霧瀰漫的環境，完全睇唔到兩個黑衣人在通道上迎面行埋嚟，呢種突然且不寒而慄嘅感覺，簡直將驚嚇感推向高潮。
蠍子王魔域迷城真人Show
玩結合真人同機械機關嘅鬼屋，當然以嚇人要嚇破膽為首要任務，不過點都要有Gimmick先可以吸引到玩得愈來愈刁鑽嘅年輕人。今次嘅重點項目就Sell蠍子王，其取材自《蠍子王傳奇》，威猛兼能震波嘅蠍子王Mathayus、具智慧兼身材惹火嘅女巫師Cassandra、手瓜起𦟌嘅勇士Balthazar，將會聯同大家喺約65,000平方呎嘅場地，經歷14個由不同場景組合而成嘅驚險刺激旅程，能否打倒暴君Memnon就睇吓你個膽夠唔夠大喇！
一入門口，我哋要由黑洞進入古埃及時代，布滿顏色星星的黑色迴轉隧道會不停的轉轉轉，雖然條黑洞橋只係短短10米，但ModelKelly一邊扶住扶手、一邊扶住壯男都要行足3分鐘，行完好似暈船浪咁無晒方向感！
轉到頭都暈，心諗都係回回氣嘅時候，點知一不留神就俾呢個黏滿沙石嘅怪人強拉入沙丘洞，呢招突如其來，的確令人嚇至魂飛魄散，難怪入城時，蠍子王千叮萬囑一定要緊握前排的人，唔係俾人拉走咗就貴客自理。
過咗黑洞不久，就見到身材超索、同電影內有九成相似嘅女巫Cassandra，佢會好有耐性以英文講解大家即將要面對嘅困難，大家除咗對佢要望多幾眼外，重要留意埋場景嘅神秘布置，非常有氣氛㗎！
開放時間：10月1日至31日
時間：10:00am-6:00pm（日場）5:30pm-11:00pm（夜場）＊
票價：每次$60（不包括海洋公園入場費）
地點：海洋綜藝廣場
注意事項：不適合12歲以下兒童、孕婦、心臟病、高血壓及幽閉恐懼症病患者；12歲或以上小童須由成人陪同方可進場。
＊夜場開放時間為逢星期五、六及萬聖節正日（10月31日）
密室凶靈
今年的密室凶靈最特別之處是由高志森監製，將2,400平方呎嘅場地設計成古老大屋，且分為八個密室，而場景、布局、角色都經過精心安排，再加上由演技精湛嘅春天舞台製作成員以互動形式兼富舞台性質嘅誇張演出，雖然全程都只係8-10分鐘，但膽汁少啲嘅你，睇怕都會嚇到傻咗，建議你哋都係小心為上！
密室入面伸手不見五指，男管家會失驚無神彈出嚟，懶正經咁介紹間大屋同佢個主人，不過最驚都係屋內嘅守衞會無啦啦追住你嚟咬，咁追法，嚇親唔在講，走得慢啲真係手都會畀佢咬咗忽。
真人扮鬼怪嘅感覺的確幾震撼，好似其中一個密室，瞓咗一個天真活潑嘅小妹妹，佢會突然鬼上身，典床典蓆咁大叫大嗌，最恐怖係佢會用啲令你心寒兼帶凌厲嘅眼神望住你，幾驚佢會走埋嚟箍住小記條頸呀！
密室的通道漆黑之餘，亦布置成九曲十三彎，由真人扮嘅鬼怪會突然撲出嚟之外，牆內極具鬼魅兼且面目猙獰嘅骷髏骨布置，真係會嚇到腳仔軟。
開放日期：10月4、5、11、12、18、19、25、26及31日
時間：5:30pm-11:00pm
票價：每次$40（不包括海洋公園入場費）
地點：海洋公園山頂纜車總站
注意事項：不適合5歲以下兒童、孕婦、心臟病、高血壓及幽閉恐懼症病患者；5歲或以上小童須由成人陪同方可進場。
魅影驚魂路
傳說中，熱帶雨林係最陰森恐怖嘅地方，往往有出人意表嘅事情發生，魅影驚魂路便以園內《亞瑪遜歷險迷程》為主幹，各位需要戴上3D立體眼鏡，進入森林內嘅神殿，各項詭秘的事情就會逐一現身眼前。
神殿內布滿各式各樣的蟒蛇怪獸，一隻大過我同你嘅蜘蛛忽然從天而降，不過經過上兩回嘅驚嚇，呢啲真係小兒科，完全無殺傷力。
神殿的牆內，原來重隱藏咗骷髏骨，只要殿內嘅射燈輕輕一掃，呢啲骷髏骨就會立現眼前，呢啲似有若無嘅感覺，都幾令人心寒㗎！
開放日期：10月4、5、11、12、18、19、25、26及31日
時間：日落後至晚上11時
票價：每次$40（不包括海洋公園入場費）
地點：低地亞馬遜歷險迷程
注意事項：不適合5歲以下兒童、孕婦、心臟病、高血壓及幽閉恐懼症病患者；5歲或以上小童須由成人陪同方可進場。
骷髏地浴血池麵
公園內的小食亭亦會炮製特別嘅萬聖節美食。好似呢碗配上麻辣濃湯的狗仔湯粉，辣辣地幾惹味，而狗仔粉又幾爽口，不過最吸引都係碗內骷髏骨頭一派美人出浴的樣子，見到都覺得幾搞笑。
鬼眼凍飲
鬼眼係今次嘅應節凍飲，凍飲內最大的賣點是在荔枝肉內釀入無核車厘子，食落口爽滑又清甜，配上加入顏色的梳打，清涼又好味，是定驚的最佳飲品。
由於舉行十月全城哈囉喂的關係，海洋公園的入場費亦有日場及夜場之分，由10月1日至10月31日，日場時間為10:00am-6:00pm，成人收費$180、3-11歲小童$90；而夜場時間為5:30pm-11:00pm，成人$98、3-11歲小童$49。如有任何疑問，可致電25520291查詢。