報章用上「氣定神閒」、「妙語如珠」形容這幾日不斷硬銷、解話的保安局長。
冇搞歪。葉太確係戴住盲毛都會開眼的大串珍珠，為閃閃令的23條開路。大粒珍珠對有銀用的女強人而言，妙不可言，是可以想像的。
但是，點可能將它「從屬」於「妙語如珠」？23條中七宗罪，幾條都S字頭，絕對不是林振強迷戀的S形體態的靚師奶，一點也不妙。一時不察，踩中任何一個S字頭，下半世你將會好唔得閒，等住在監獄穿膠花，終身學習。
也許編輯覺得保安局長解話，有點似講佛偈。所謂「妙語如珠」那個「珠」，是影射佛珠咁解。23條的Sedition、Subversion、Secession，合稱3S，有佛味就假嘅。睇落卻幾似波纜暗號，S字加兩棟，就是銀両符號。記者認為保安局長「妙語如珠」，可能是指她開口的模樣似攪珠，睇23條條文，等同刨貼士，屋村阿嬸用來研究開邊幾個冧巴，有利落注。
「氣定神閒」就唔錯得晒。淨睇幾套局長春裝已經夠架勢。秋天已經到了，春天還會遠嗎？氣定了，神就閒。你打醒精神睇睇葉太上立法會那襲紅衣，還是打了格仔的哩。你說心口打格仔的女人會令你神經緊張？寬鬆了五年，將來，過一下緊日子，就當係天天着住緊身衫瘦身，好快會慣。