一年一度嘅東京GAMESHOW終於曲終人散，今年似乎並無乜大驚喜畀到人，好多日本大作都要等到11月尾先會陸續登場，相反美國今個月就搏晒命咁出正Game，好似《TheTerminator:DawnOfFate》，《KINGDOMHEARTS》，《SuperMan》，《Robotech》（3D版超時空要塞）等，都相繼推出PS2版，其中《Robotech》重會有限定版推出㖭，Fans要昅實喇。
有時日本廠商真係偏心得緊要，好似KOEI喺前幾日先將大作《真．三國無雙2》移植到XBOX推出，PS2都出埋《猛將傳》啦，𠵱家先炒冷飯出舊作，都咪話唔大細超，所以好多Game舖老細都話今次銷情麻麻，而同日推出嘅XBOX另一重頭大作《MaxiumChase》反應亦只算一般，市場普遍都係交投淡靜。
雖然DreamCast已經停咗產，而對應遊戲亦愈嚟愈難搵，機主分分鐘要飛去日本先有機會搵番啲舊Game，不過近排灣仔數字場就返咗批平貨，好似《機戰》、《SoulCalibur》、《Sonic2》限定版等全新都係賣六、七十蚊左右，想搵番就快手去買喇。
文：打機鐵人