警廉關係向來備受關注，咁啱噚日警、廉兩個執法部門，又同時公布高層嘅人事調動。廉署執行處首長郭文緯下個月十六號退休，由現時統領調查私營機構貪污案件嘅執行處處長李銘澤接任。
即將榮升廉署執行處一哥嘅Daniel（李銘澤英文名）喺香港大學畢業，加入廉記已經二十五年，政府同公、私營機構嘅貪污案件都做過，好似立法會前議員程介南以權謀私案、稅務局前副局長單羅玉蓮騙房津案、廣南案、短樁案等幾單大案，都經過佢手。Daniel又曾經做過廉署嘅情報同內部調查工作，九八年代號「石破天驚」行動，將涉嫌與國安人員交往的廉署人員拘查，就係佢負責。
八方噚日問呢位候任執行處首長對升職有乜感受，Daniel話喺時勢不斷咁變嘅年代，呢個係新挑戰，而佢首要面對嘅挑戰，就係政府要縮減開支。問到佢同警方嘅關係，佢話不嬲都唔差，但發生警廉事件後，會進一步加強溝通。
至於接替李銘澤職位——廉署執行處（私營機構）處長嘅係現任助理處長陳德成，佢曾形容自己有「獵人性格」，又負責過聯交所案同徐道仁案等大case。
執行處老頂郭文緯同八方講，對於呢兩位下屬嘅任命感到高興，因為都係佢向特首同專員推薦嘅人選，相信執行處喺佢哋嘅領導下，可以繼續獨立執法，打擊貪污。
傳真︰2623-9278
電郵︰