問責制下啲局長為求出位，真係吓吓都真情流露。素來有「公子」之稱嘅工商及科技局局長唐英年（圖），從政多年一向談笑用兵，噚日竟然無端端灑淚人前。
唐局長噚日喺香港青年協會舉辦嘅「真情對話」分享會內，同八百幾個青年對話。當講到對青年人有乜期望時，唐英年就話自己對佢哋充滿信心，但係見到有啲青年人為咗小小挫折就輕生或者自殘，就覺得好失望。本身有四個小朋友嘅唐局長，講講吓竟然忍唔住喊起上嚟！重係眼淚、鼻涕一齊嚟，台下一個女學生即時遞上紙巾，場面感人。
台下有人話財政司司長梁錦松曾公開唱《獅子山下》，問唐局長可唔可以又高唱一曲？逗得局長破涕為笑，喜孜孜咁唱咗兩句《HappyBirthdayToYou》，雖然有啲交差了事，但仍然博得全場掌聲。
黃冠華攝
傳真︰2623-9278
電郵︰