二號種籽費里路噚日接連打敗摩利臣同杜貝斯，順利躋身四強，雖然兩場都唔算好激烈，但都用咗唔少體力，所以打完八強贏咗杜貝斯後，就即刻喺球場外圍輕鬆跑步；主要係放鬆疲勞嘅肌肉，令到體力可以恢復得好啲，並唔係佢打唔夠。
唔少球手都有參加雙打賽事，其中首圈力戰輸畀慕耶嘅美國新星甘比爾，噚日朝已經見佢同佢爸爸同訓練員係維園外圍網球場練波，下午又見佢係二號場練波，稍為休息之後又打雙打，可謂認真勤力，睇吓佢第日有冇好成績回報啦。
首號種籽沙芬連續兩年喺沙龍網賽次圈出局，佢自己梗係失望，賽後記者會都冇晒心機，但佢就話，提早出局可以有啲時間係香港買嘢，周圍睇吓，而佢班球迷見到沙芬輸波，就相當傷心，有啲重眼有淚光，反而要沙芬安慰。