劉德華噚日四十一歲牛一，雖然佢出咗埠做嘢，但估唔到新城電台都咁識利用機會，借華仔幫佢哋嘅DJ葉文輝（啤梨）上位。
話說新城噚日下晝搞咗個《新城「愛」德華義工日》活動，由啤梨等一班新城DJ帶領一班雙失青年（即係失學同失業）去做義工，包括探訪庇護工場同老人中心，又到幼兒中心做老師，以及幫獨居老人清潔家居等等。
新城話希望透過各類型嘅義工活動，培養雙失青年幫助人嘅意識，又話趁住噚日係華仔生日，所以將個活動定為《新城「愛」德華義工日》，作為送畀華仔嘅生日禮物。不過，華仔本人就冇份出席。
講真嗰句，新城咁做咪即係擺明借華仔過橋，捧自己台嘅DJ啤梨上位，做義工咪做義工囉，使乜搞咁多花款呢！
譚小環噚日喺電視城試造型，佢話：「我今日幫《推理家族》試造型，喺套劇入面我要做一個癲婆，啲朋友都話我做番自己，真係激死。個角色唔係一個普通癲婆，係一個有機心嘅癲婆。」小環覺得自己近年嘅演技大有進步，佢話：「記得以前拍劇，都唔知做乜，𠵱家先知真係得個靚字冇用。」
小環重話專心拍劇，冇心情拍拖，一度俾朋友懷疑佢性取向有變，小環話：「我係冇拍拖，但係有人追，不過就冇feel囉。相士話我天生勞碌命，冇得靠老公，又唔會有錢唔使做，所以都係要畀心機做嘢。」
葉璇呢排日以繼夜為無綫新劇《衝上雲霄》開工，佢日前喺赤鱲角機場拍劇，唔知係時間太匆忙，定係佢一時緊張，竟然去完洗手間就唔見咗部Nokia手提電話。葉璇唔想同朋友失去聯絡，即刻攞番以前部電話出嚟用。馮仁昭事後同佢傾開嗰陣佢話：「呢次都係自己烏龍，不過當破財擋災，因為唔見咗電話嗰日，我倒車時差啲同後面架車相撞，好彩及時煞車，否則後果好嚴重。」
電眼小生同女藝人拍咗拖好耐，成日都傳佢哋分手，最近電眼小生重俾人影到出去媾女，但係電眼小生又返去同女藝人一齊住，所以大家都覺得佢哋嘅關係撲朔迷離。其實電眼小生同女藝人早幾個禮拜真係分咗手，點解冇搬走？係因為電眼小生知道有記者跟佢，所以專登扮返去嗰度。咁都畀佢諗到，真係用心良苦。
黃家強嘅新碟會喺下個月推出，噚日佢接受電台訪問時，透露自己因為言多得罪人，佢話：「幫我搞唱片形象嗰間公司叫我着件深藍色同白色嘅橫間衫，同埋一對黑白格仔嘅波鞋影封套，我覺得咁着，會覺得我好細粒，轉頭佢哋就打畀少寶（環球總裁陳少寶）話唔接呢份工，𠵱家惟有搵第二間公司做。」
離開娛樂圈一段時間嘅女歌手，一直認為自己搵到好對象。點知佢將自己所有積蓄用嚟投資，結果蝕清光，好多朋友都覺得佢信錯男友，因為佢男友做生意根本冇經驗。
其實佢咁珍惜呢個男友係因為同男友拍拖之前，同一個亞洲好紅嘅靚仔型男拍拖，點知型男連分手都冇講就唔見人，搞到女歌手好傷心，所以佢特別珍惜𠵱家呢段感情。