非常健談的余國榮，最懂得如何跟客人打開話題，在加拿大住過四年的他，英文好之餘，又識得電腦繪圖，加埋工作經驗，做家具售貨員必定好快上手；而在玩具行業做了二十年的周炎強，希望自力更新，失業一年多都不想靠綜援；還有兩名積極搵工的聾啞青年，都希望各位僱主給他們一個機會。
記者：李敬賢、陳漢榮
攝影：陳智良、陳漢榮、陳偉強
場地：銅鑼灣aluminium
推介一
大起底
學歷：預科畢業
工作經驗：家具售貨員1年、清潔用品推銷員6個月、茶餐廳水吧3年
一技之長：記性好、口才好、電腦繪圖
我的志願：1.家具售貨員
2.茶餐廳水吧
要求待遇：面議
即席畫圖畀客睇冇問題
我以前賣開辦公室家具，但就算屋企家具都冇問題，因為推銷嘅原理一樣，而且我記性好，每件家具嘅尺寸都會記住，唔會俾個客問到口啞啞。我又好熟電腦繪圖，平面同立體圖都識畫，如果請我就唔使由頭教起，即刻畫個圖畀客睇都得。加上我咁健談，同客人打開話題再Sell貨就最啱。我亦曾經喺加拿大生活過四年，喺親戚開嘅茶餐廳做過水吧，英文又好，招呼遊客講英文都無問題。
抹家具好專業
抹家具要有技巧，真皮同人造皮梳化的清潔方法亦有不同，這點阿榮當然知道啦，所以佢拎起塊布用專用清潔劑抹張真皮梳化，唔使十秒乾淨晒。售貨員阿Wing提佢，千祈唔好用含酒精的清潔劑抹人造皮，否則會整爛塊皮。
以前阿榮賣辦公室家具時，搬夾萬都係閒事，叫佢搬兩大盒燈，當然難唔到佢。
梳化套用的布料，每種都唔同，要注意的地方亦有分別。Label上的資料阿榮大致都睇得明，例如甚麼質地、只可乾洗等，只係有啲代號唔知代表甚麼，但佢有信心，返工之後就會好快記得。
有四年家具售貨員經驗的阿Wing：「樓市唔好時，家具生意都會差啲。做家具售貨員除咗要有一般推銷技巧外，重要識得保養家具，最好要主動，有時啲客唔識襯時，亦要主動畀意見。阿榮賣過辦公室家具，改賣家居嘅會好快上手，有經驗會着數啲。」
推介二
玩具店東主轉做售貨員20年經驗乜都曉
大起底
學歷：中五
工作經驗：20年玩具批發
一技之長：普通話、英語、電腦操作
我的志願：1.玩具精品Sales
2.玩具精品買手
3.望有老闆投資，重組新公司開發新市場
要求待遇：$8,000至$10,000
發掘新產品是強項
我曾是玩具批發公司東主，經濟不景被迫結業，猶幸累積了20年經驗。我熟悉生產線，與生產商、百貨公司、連鎖店有緊密聯繫；懂為玩具定價；與版權持有人討價還價、推廣宣傳、發掘新Product更加是我強項，可以話一條龍瓣瓣掂。雖然失業一年有多，但我不想靠綜援過活，自信憑雙手可以維持生活，欠缺的只是一個面試機會吧。
周炎強有幾多料，就由TeddyKids經理Doreen考考他吧。
Doreen：貨物標價是來價的多少倍？
周炎強：由批發到門市零售，正常來說是1.6倍，如果是貨尾或特價貨，來價可以更低。
Doreen：全中！
Doreen：要你Sell這件貨品，你會怎樣Sell？
周炎強：這貨品叫MagneticWorks，用磁石變出不同的玩意，有教育意義，讓小朋友知道磁性有正負兩極的物理特性。
Doreen：配件這麼細小，不怕小朋友吞下肚嗎？
周炎強：有Warning貼紙寫明不適合三歲以下小朋友，Sell客時提醒家長留意。
Doreen：貨品資料巨細無遺，滿分！
Doreen：「做Sales又好，做買手又好，首先要完全熟悉產品資料，避免被人問到口啞啞，建議多上網多接觸新事物；另外，這行非常靠人際關係，邊度嘅貨最新最平、用邊種方法最快散貨，一定要懂。」
推介三
聾啞青年自食其力Tommy包裝送貨冇問題
大起底
兩位聾啞青年Tommy和Steven離開學校之後，一個兼職派報紙，每月搵唔夠一千元，所以好希望搵份穩定嘅長工；另一個就做過麵包工人，佢就唔肯上鏡，但都希望有僱主可以畀個機會佢哋。
學歷：中四程度 工作經驗：派報紙4年
一技之長：基本電腦知識、上網、基本英語
我的志願：1.包裝工人 2.跟車送貨
3.清潔工人
要求待遇：$5,000-$6,000
捱得兼大力
我𠵱家失業，搵咗好耐都搵唔到工作。我以前試過包裝聖經及VCD，捱得兼唔怕日曬雨淋，我覺得自己好大力，所以跟車送貨做得掂。我雖然身體有缺陷，但工作能力同其他人無分別。我想話畀各位老闆知，我好有禮貌，而且一定會努力工作，希望可以畀機會我幫你手，一起合作。
推介四
Steven整麵包最在行
大起底
學歷：中五畢業
一技之長：整蛋糕、麵包、影印
我的志願：1.麵包工人
2.包裝工人
3.影印工人
要求待遇：$5,000
香港聾人協進會就業訓練員黎小姐：「現時失業率高企，殘疾人士搵工會更困難。本港有些聾啞人士組織可以幫他們主動聯絡僱主，解開僱主對聘用聾啞人士的疑團，而且會安排電腦輸入法、汽車美容等培訓課程，從而提高聾啞人士的就業機會。」所以Tommy和Steven依然有大把機會搵到工作。