早前，香港大發代理為應大型TVGame嘅發布會，運嚟最新Copen開篷Roadster造勢，惟兩個月過後，仍未見呢部人氣小車在港推出嘅消息；再者，有傳香港代理要待明年初方能引進配備半自動波嘅Copen型號。但最近已有一獨立車行，引進咗全新配備有半自動波嘅Copen到港，實在係急不及待嘅Fans一大喜訊呢！
記者、攝影：伍旋卓
新車售價：$159,000
車輛提供：穎進汽車（27187919）
為貫徹圓渾嘅設計，車廂鋪排除見有一份跑車氣息外，大多數儀表及按鍵亦見以圓形作組合，凸顯個性同時代節拍外，桶形跑車座椅，亦同樣予人有實在嘅貼服同承托性；設備除電窗、電鏡、中央門鎖同原廠冷氣外，當然唔少得重有一按式上落嘅電動硬頂，同埋雙安全氣袋組合啦！
呢部模仿德國奧迪TTCoupe嘅日本人氣Roadster，甫於上年東京車展現身，經已備受全場與會人士矚目。這不在乎佢嘅模仿度，而係響同儕嘅K-Car級別中，竟可擁有一個全自動硬摺頂裝備，實在令不少大車廠為之汗顏。從中亦睇得出，大發背後得豐田車廠嘅全力支持，又豈止係一間小車廠咁簡單呢！
呢部Copen一台659cc直4Turbo偈（馬力64ps/6000rpm；扭力11.2kgm/3200rpm），匹配4前速半自動波，起跑加速有力，雖然欠缺尾段嘅衝刺力，惟轉檔反應敏銳兼有手波車嘅快感㗎！再者，穩紮底盤加上Racing化懸掛設計，重體驗有出眾嘅循迹感㖭！
呢部樣子夠Cute，兼且酷似奧迪TTCoupe嘅大發CopenRoadster，一台659cc直4Turbo偈加速有力，匹配4前速半自動波好玩多Fun，而且又富駕駛樂趣，重有穩紮可靠嘅循迹感；而電動硬摺頂組合，更可謂冠絕同儕㖭。惟車廂用料一般膠感味濃，亦稍欠跑車配套修飾。