新地（016）派完成績表後，個價繼續上，最高48.70元，收47.90元，升50仙。
新地有得升，照正啲相關Call輪應該升，啲Put輪應該跌。不過實情啱啱相反，Call輪微軟，Put輪微升。咁嘅現象，可以代表正股近排升得過急（禮拜二最低得42.80元，至今升幅5.10元），驚住有回吐。另外一點，係新地除咗派例息1元之外，再派特息0.6元。Call輪冇息收，高息不利Call輪，而正股日後除淨，股價調整，則亦對Put輪有利。
不妨先計吓新地除淨價，11月26日除淨，折合46.30元。新地Call輪9524，收29仙，跌1.5仙，溢價16.6%，槓桿率16.5倍；隻輪係明年3月到期，過咗除淨日子，以新地除淨價計，溢價實際係20.6%（槓桿率則得番16倍）。所以，正股升而Call輪唔升，好合理，除非正股股價升幅高過股息。
又以新地Put輪9443為例，昨收1.18元，升3仙，表面溢價5.6%，槓桿率4.1倍。隻輪明年1月夠鐘，過咗新地除淨日子，以新地除淨價46.30元計，隻輪溢價實際只係1.9%（槓桿率則係3.9倍），低好多。暫時，賭新地輪，買Put輪好過買Call輪。
章 盛