近日接連有投資公司上市，繼富泰大中華（1226）上市之後，噚日又有隻第一亞洲資本（1227）掛牌，雖然兩隻股業務性質相近，連帶上市代號都緊緊相連，但兩隻股由於搞手唔同，所以表現會迥異。
第一亞洲噚日收54仙，較50仙招股價高出8%。至於富泰大中華則繼續升到你唔信，噚日又升9％，收72仙，較招股價50仙高出44%。
經紀黃話，富泰大中華幕後搞手，以往最著名嘅力作有CEC控股（759），至於收尾反目成仇就係後話，但總之佢哋嘅玩法，就係連同班寶島炒家搞私人派對，股價通常一支箭咁升上去，然後在高位度橋派發。
第一亞洲幕後玩家性格就唔多相同，佢哋通常最多頂一兩日，之後就好快散檔，當然咁做，主要係成本問題。
總之一句講晒，呢類股份唔多適合一般散戶炒作，若然玩即日鮮賺到錢者，可以叫做僥倖。
慕容小初