喇沙T最近在ebay網上被稱花園街王子，經佢戶口賣去英美嘅波鞋，多過月餅場一間舖頭仔，嚇壞波鞋批發。全球波鞋瘟仍未痊愈，好多亞洲版關刀都運唔到去英美，所以益咗班網上大拆。
有時好生意起嚟，誇張到唔夠貨賣，搵貨好傷腦筋，一時唔覺意隨時賠本。喇沙T：「𠵱家最怕入錯假貨，早排《便利》報道大陸做假波鞋，啲料認真堅，教埋點分辨啲料幾Up-date，不過又益咗班蠱惑仔，睇完本雜誌後，知道已被揭穿嘅破綻，下一批貨自然會改善。以前提防假鞋最容易方法係睇盒，可惜班大蠱惑已經紛紛改良，新一批假貨個鞋盒已經拍住真嘢，以後可能要睇Code先至分到真假。」
另一方法就係斬腳趾避沙蟲，一知道個款有假鞋，就即刻唔好掂。咁點有最新假鞋情報？喇沙T教路：「好簡單，只要上日本 http://auctions.yahoo.co.jp/jp/收料就知，嗰度有個賣家好出名，獨沽一味只賣假鞋，只要佢Post最新嘅鞋款，一個月後羅湖商業城即有假貨賣，可以話佢係假貨界專賣Sample試辦嘅大哥，呢期佢不斷賣DoubleName鞋款，可能嚟緊佢哋專攻別注款，大家要小心。佢個id係rinrin300193，鬼咁難記，等你搵佢冇咁易呀。」
主持人：大食Jack
八卦熱報：