九月二十三日收到花旗銀行信用卡月結單，內附一份宣傳單張，講紐約愛樂團亞洲巡迴音樂會，十月二十二日喺文化中心舉行，最靚座位嘅票價係七百八十元，我哋可以向Citibank電話理財服務預訂。二十四日早上叫秘書訂票，得到嘅答案係：門票已沽清。呢個世界，行慢啲都執輸，想學人扮高尚，聽吓紐約交響樂都唔得。
既然如此，不如睇香港話劇團嘅《新傾城之戀》啦（十月十九日籌款首演），點知聽到消息，呢套劇非常受歡迎，出面撲飛熱烈，睇嚟又係要行快一步。
花旗集團獨家贊助「紐約愛樂團」，《新傾城之戀》唔知有冇人贊助，問賓架W有冇計（撲飛也），佢話：「你估我識印飛咩，印到都會俾警察拉！」既然冇計冇飛，不如講第樣。賓架W話：「精通佛教要義嘅外滙高手馮孝忠（Andrew），就快轉工，唔做澳洲銀行，投往DBS道亨。DBS嘅高級董事黃鋼城係外滙高手，與梁錦松齊名，道亨本來就有另外一位高手譚炳勝，𠵱家馮孝忠走埋過去，DBS集團莫非想喺外滙市場大展拳腳。」
講到明就長氣咯，𠵱家市道艱難，銀行搵食唔易，黃鋼城全權負責管理DBS嘅香港業務，包括DBS、道亨、廣安、海外信託，可能吼中外滙呢一瓣最具發展潛質，當初有傳聞話阿松搵黃鋼城做財經事務局及庫務局局長，好彩冇咁嘅事，都係做賓架好過。