噚日跟足球隊操練，就真正感受到乜嘢叫做雷聲大、雨點小。
小記所講嘅，當然唔係釜山呢邊嘅天氣報告，而係大會專程搵來兩個保鑣，繙譯、聯絡員同司機各一個，總共五人陪港隊練習；點知因為司機唔識路，搞到港隊班球員來回搭咗三個幾鐘頭車，而最後只練得四十五分鐘嘅勞師動眾安排。
由於大會嘅通訊安排欠妥善，小記同足球隊失去咗一日聯絡，噚日終於搵到總監李輝立，之後梗係第一時間追訪呢隊「香港第一擊」嘅新聞。但估唔到，小記同班球員再見時，竟然係七嘴八舌咁投訴選手村同交通安排嘅問題。
經小記細心聆聽下，得出嘅結論都唔係太差。聽班球員講，選手村嘅生活，只不過係房間冇電視、冇電話，每次去食飯要行成十五分鐘（唔通可以幫助消化？）排隊打電話要半個鐘，排隊上網更加要半日時間；而好似噚日去比賽場地昌源操練，就搭咗三個幾鐘車。