任賢齊（小齊）來港發展後，先後跟莫文蔚、鄭秀文和盧巧音傳緋聞，但小齊表示與他拍拖十年的女友Tina才是結婚對象。可是小齊卻坦言，莫文蔚經常在其腦海出現……
小齊當年憑一曲《心太軟》唱得街知巷聞，他初來港時，便和當時與他同唱片公司的莫文蔚（Karen）傳出緋聞，二人更曾在台上有大膽的親吻動作。其後小齊與鄭秀文（Sammi）拍電影《夏日的麼麼茶》時，又傳出緋聞，到最近拍攝新片《好心相愛》時，又傳和盧巧音擦出愛火。
任：任賢齊 記：記者
記：你曾經分別同Karen、Sammi傳過緋聞，點睇呢兩個緋聞女友？
任：Karen係一個好有才華嘅女仔，佢又識唱歌，又識彈古箏，打扮又有自信，係好有性格嘅人。我覺得佢好似一個叫Emily嘅公仔，好有神秘感，我又好鍾意佢喺《食神》入面嗰個醜樣嘅角色。我好想同佢合作拍戲，我自己成日都會諗啲劇本，我腦入面都有好多角色畀Karen做。
而Sammi給我一種好唔同嘅感覺，其實我覺得佢係一個好獅子座嘅人，好cute，工作好用心，佢唔做嘢嘅時候好friendly，絕對冇擺天后款。其實我都盡量小心，但就係唔知點解會有緋聞，我最怕係令到人哋有麻煩。
記：有冇諗過介紹Karen同Sammi畀Tina識？
任：其實佢唔係成日跟住我做嘢，佢𠵱家都有幫吓人做形象，我亦都唔係咁鍾意女朋友跟住我做嘢，而且我都唔想太刻意，Karen佢一早就認識。
眾所周知，小齊已有一個拍拖十多年的女朋友Tina，不知有沒有打算給Tina一個名份呢？
任：結婚？我真係唔知幾時呀！隨緣啦！不過佢（Tina）當然係我結婚對象，唔係都唔會拍咁耐拖。其實我覺得自己好幸福，我記得以前啲歌手談戀愛係好大問題，但𠵱家啲人成熟咗，唔會再覺得係啲乜嘢問題。
記：結婚會唔會公告天下？
任：我諗唔會啦，應該會好低調，可能會試吓跳傘結婚，都幾好玩呀！不過我女朋友就辛苦啲，其實我都想結婚，因為我好鍾意小朋友，但係心情好矛盾呀！如果冇BB，就好似好冇成就感。我都三十幾歲，要BB都差唔多，我唔想同個仔距離太大，我怕我唔夠個仔打同冇時間陪佢。
小齊這些年來都忙於工作，很少時間陪伴父母，他對此都感到非常慚愧，幸好得父母的體諒。
任：每一次都要爸爸媽媽由鄉間去台北探我，好在佢哋身體重好健壯，佢哋亦明白我做嘢辛苦，從來冇有怨言。
採訪：胡比
攝影：何國豪、黃文成