今年好多位老友都在暑假去日本旅行，原因不外乎三個：（一）去歐美太遠，怕搭遠程飛機；（二）東南亞去得多，吸引力減退；（三）日本反而百看不厭，淨係喺東京逐個區行街，一日行一個區，都可以行足幾日。
惡佬明、建築邦、賓架P、經紀K、馬主H等都去完返嚟，惡佬明甚感不快，玩完返嚟香港，好多嘢睇唔慣噃。佢晨早去到茶餐廳食早餐，啲夥計愛理不理，口擔住煙，猛講昨晚場波同埋點解咁唔夠運，中唔到孖T，粗口問候對方阿媽，自然唔少得啦。惡佬明心諗：朝朝聽你哋啲噪音，人客點食得安樂吖，喺大阪之時，佢哋走入一家食店，店內無其他顧客，惡佬明一家人入到去，全店六位夥計立即起立，大聲招呼，各就各位，不講廢話，你話佢哋做戲都好，總之人哋面對人客，夠晒尊重，絕不騷擾，邊會好似香港啲老式茶餐廳、茶樓嘅服務態度㗎。
左丁山認為此乃中國人之「差不多先生」嘅習性不改，做事得過且過、唔夠認真之故。非特一啲餐廳為然，馬主H嘅肥仔經過屋企附近一個地盤，見到啲燒焊工人開工，不戴安全面罩，以肉眼睇住燒焊，真係隔籬睇見牙煙，點解啲工人咁冇安全意識呢？皆因怕麻煩唔認真之故，同啲日本工人嘅專業態度相比，差得太遠咯。