中國隊第一批為數三百幾人嘅先頭部隊噚日飛抵釜山，釜山機場已經唔算大，加上超過三百幾位中外記者同熱情fans夾道迎接，只得一條人肉冷巷畀中國隊經過，場面極為墟冚，足足擾攘咗兩粒鐘，成隊中國隊先至可以離開機場。
噚日抵埗嘅中國隊都有唔少明星運動員，好似體操靚仔李小鵬，自然成為fans追捧對象，一向趕潮流嘅李小鵬，噚日拎住部新款攝錄機出機場，對fans合照冇托手踭，不過條件係要畀小鵬影番轉頭；而NBA新人狀元姚明就好「酷」，對記者提問只係一句起兩句止，又唔多肯同fans簽名，唔通就嚟浸鹹水巴閉啲？
雖然日前發生北韓升旗禮時用錄音帶播國歌「大細超」事件，但籌委會對北韓籃球員李明勛唔敢怠慢，特別為呢個身高七呎七的中鋒製造「超巨」桌椅及睡床畀佢喺亞運期間使用，甚至拆埋接待北韓專車的前座座位，等佢坐得舒舒服服。
負責評審運動員代表資格嘅亞奧理事會司庫山迪鉑，噚日開記者會表示收到三個有關代表資格嘅投訴，其中兩個就係香港女乒運動員林菱同帖雅娜，來自泰國嘅山迪鉑重話今日開會決定佢哋嘅參賽資格，咁啱港乒隊今日抵埗，如果俾大會否決出賽資格，林菱同帖雅娜隨時「原機」返港。