唔好以為市靜就冇人做嘢，噚日經紀陳同小初講，香港葯業（182）又有新消息，聽聞又話想開車。
小初記得5月份炒過呢隻股，賺過少少錢。當時外資行忽然對細價股有興趣，撞啱有間歐資行又出咗份報告，話香港葯業值兩皮樓上，重帶團去星洲做過一次路演，所以隻股曾經受到追捧，但可惜炒風甚為短暫，未能持續，搞到小初急忙跳車。
上次香港葯業在1元水平，亦曾經傳過想炒作，但一直都唔見有何動靜，收尾重輾轉回落至70仙樓下。噚日股價跌2.7％，收72仙，真係橫睇掂睇都冇啲鑊氣，全無開車迹象。
開頭小初重以為班炒家冇力，但經紀陳就話聽到有個新版本，佢話有人斟緊配股，所以特登將股價質低，搞掂之後會見真章。
總之一句講晒，真係信不信由你，稍後若見到隻股真係成交大增嘅話，就知道經紀陳所講嘅係堅料。
慕容小初