超人李嘉誠噚日下午兩點左右喺中環長江中心地下大堂出現，「碰巧」遇上八方及大批傳媒喺度「擺晒陣」等佢。超人欣然趨前接受傳媒訪問，至於點解咁巧合碰見超人，大家沒有深究，但超人就道出原委。
佢話上次出席潮屬各界慶祝國慶酒會時遇見記者，搞到情況混亂，若然唔好彩嗰日火燭，一定好大件事。超人重話：「嗰日有兩個女仔，逼到我埋牆。我要兩隻手出晒力喺後面頂住。」堂堂香港首富，相信都係第一次俾人逼埋牆角，難怪佢要特登「偶遇」傳媒，從容一啲同大家傾吓偈。
至於乖仔長實集團副主席李澤鉅辭任合和非執行董事一職，難免令人有所聯想。李嘉誠噚日解釋，話李澤鉅唔係辭任，只係任期完咗，唔再重選。佢重贊個仔做得啱，因為如果有利益衝突，而佢仍在其位，會好尷尬。又係嘅，早排同合和主席胡應湘嘅過節，都唔知幾時至收科？
對於《壹週刊》上星期話超人想退休，超人噚日亦有回應，佢強調：「我就算想退休，都唔會係嗰間傳媒知先，係都係我自己同下屬知先。」
（圖）李超人昨日「巧遇」傳媒，道出不為人知的「豔遇」。
傳真︰2623-9278
電郵︰