雖然呢幾年經濟低迷，香港人消費力大減，但仍無損香港響亞洲區嘅特殊地位噃！事關早前勞斯萊斯秘密運嚟2003年全新轎車，預展畀班有財力嘅VIP賓客後，今個周末重有寶馬Z4嘅亞洲首展，雖然部Demo車只得手動軟篷頂，而唔係量產型嘅電動軟篷頂，惟廠方對香港市場嘅重視程度可見一斑。而亞Mark最近跟英國賓利汽車嘅香港大員AlbertHui傾開偈，佢重託亞Mark向大家報料，話嚟緊2003年全新賓利ContinentalGT跑車，響剛啱舉行嘅法國巴黎車展正式登場後，部車響10月8日重會空運抵港作亞洲首展㖭！呢部擁有四座位設計，以一台6.0公升12汽缸TwinTurbo偈，匹配6前速自動波，以恒式四輪驅動嘅超級跑車，車價預計會響二百萬之內；雖然唔係每個香港人都有能力擁有，但香港人有機會近距離接觸噃！身為一分子嘅你，係咪覺得好有Face呢？