港股在連跌6日後終於有反彈，今次升市得力於地產股。阿董及阿松出完口術後，地產商即時和應。據老編報料，長實（001）主席李嘉誠噚日中午飯局後喺長江中心「偶遇」傳媒，強調今次政府真係有決心，跟住誠哥馬仔即刻跳出嚟，話旗下樓盤全線加價。地產股噚日即刻有強烈反應，其中信置（083）升8%，恒地（012）亦升7%，但出市仔話，睇盤路噚日多數係空倉盤平倉，唔係基金入市掃貨。
基金梁更話，佢哋唔會咁快入市掃貨，原因係政府過去5年多次手口並用，希望刺激樓市，但冇一次成功，今次能否改變往績，梗要「觀其言聽其行」。不過，阿虎相信地產股第4季應有運行，誠哥噚日差不多講明會增購長實，加埋郭氏家族亦話上次在50多元增持的行動可能再現。因此，阿虎提過的「沽滙豐（005）掃新地（016）」策略仍然可取。
華南集團（159）午後突急挫，跌幅曾達65%，低見6仙，收報9.8仙，仍跌42%，成交增至逾1467萬股，涉113萬元。一位經紀老友話呢隻股要動大手術重組，有投資者注資，但上周四復牌後不斷回軟，有傳聞佢噚日被人斬倉。其實主要係因為隻股停牌前，有一些街客攞貨，但延至近日才攞到新股票，街客唔計價沽貨，所以股價才急挫，新股東應未做嘢。佢重話此股底線係6仙水平，下次見到呢個位可以考慮。但阿虎寧願等陣先。
歐亞（932）復牌，股價初初升成1成，以為好掂，可惜其後沽盤不絕，股價即刻倒跌，以接近全日最低位0.45元收市，跌幅27%，成交達1.21億元。據悉，證監會正全力進行調查，暫時可以睇少隻。
阿 虎