好多人問，「摩記」呢隻E360用個「劈友價」$1,630出招，搞到「屍橫遍野」。咁低價位，擺明都係想引你哋啲人換機，以廣銷量咁啫。現時彩芒機已成主流，唔通重玩灰階黑白機咩！你屋企都唔會睇番黑白電視機啦。
彩芒、影相、高階和弦、下載功能等，已成今時今日手機新指標。而呢款超平E360，據聞「摩記」落咗張巨型定單畀廠，不過此機少咗啲功能，無紅外線啦、無得拍照傳送、比較大部，所以一分錢一分貨。
但作為一部低階嘅入門彩芒手機，呢部都係首選考慮。遲吓「西門慶」嗰隻處女彩芒機面世，分分鐘推個「震撼燒炭價」，預計低於$1,600蚊水平，志在打擊對手兼搶奪市場，絕不出奇矣，總之彩芒手機市場嘅戰事𠵱家先啱啱開始，各大廠奇招肯定陸續有來。