有線早前接觸過陳錦鴻商談合作事宜，最後陳錦鴻大口氣地說：「我諗你哋有線冇嘢啱我做。」有線高層徐小明表示有同事因此事覺得委屈，但陳錦鴻卻否認自己有講過這些說話，徐小明則直斥陳錦鴻的回應「不知所謂」。
陳錦鴻於本月中曾公開「𢱑撈」，表示自己很想回巢無綫，他甚至願意降低價錢。本報收到消息，早前有線電視曾經找過陳錦鴻商討合作事宜，但合作不成，陳錦鴻更態度囂張地向有線的員工說：「我諗你哋有線都冇嘢啱我做嘅嘞。」此舉令有線十分不滿。
昨日記者致電有線電視節目部執行董事徐小明求證此事，他說：「我都聽到有同事因為呢件事受委屈，其實就算合作唔成，說話都應該彼此尊重。當然我亦明白演藝界有好多演員想去大台，但係屋大都會住滿人啦！」
徐小明強調有線絕非細台，他說：「大台嘅節目發展到某個程度都會飽和，所以有啲節目係佢哋唔做，我哋會嘗試去做。況且有線絕對唔係細台，國際性嘅節目都有做，如果有線想主力發展娛樂，一定可以做得好好。」
徐小明續說：「好多藝人都話𠵱家冇嘢做，但係我好奇怪，點解有啲人有發展機會畀佢，佢都唔識得去把握。有線嚟緊會發掘多啲新面孔，無論係新人抑或係舊人，有興趣喺台前幕後發展嘅，我哋都好歡迎。」
昨日記者致電陳錦鴻，問及有關他與有線電視談不攏的問題，他否認跟有線方面傾過合作，陳錦鴻說：「我冇同有線傾過喎，我同中國星有合約，根本我就唔可以自己去傾工作嘅，所有搵我嘅人，我都會叫佢哋去搵中國星。」問他是否講過有線沒有工作適合自己的話，陳錦鴻說：「口耳相傳嘅嘢不足信，係咪有人親耳聽到吖，聽到嘅係邊個吖，或者有人想做新聞。」問陳錦鴻有線是否曾接觸過他，他含糊其詞說：「好多人接觸過我，我一日見咁多人。」
記者將陳錦鴻的回應轉述給徐小明，他說：「佢咁樣講，真係不知所謂！」
採訪：張止寒