失業、被僱主拖欠薪金，不幸的事情，彷彿都衝着阿英一家而來。連月來，她與三名稚子都要勒緊肚皮度日，惜今天他們已走至窮途末路，因為欠租及欠交各項雜費，一室婦孺將面臨被迫遷及截電、截水的命運，蘋果日報慈善基金遂即時撥款救急。
在記者抵埗之前，房屋署的職員才剛剛來過找阿英，因她已欠租多時，未有依時清還。「𠵱家欠咗房屋署一個月租，職員上門追過幾次，我哋都好難堪，但冇辦法，我哋真係冇錢交。」阿英手持房屋署的欠租通知書，一臉無奈地對記者說。
三十八歲的阿英，膝下育有三名現年分別十二歲、十歲和九歲的年幼子女，因為有嚴重腰患，婚後沒有工作，經濟擔子全落在任職地盤工作的丈夫羅先生身上。
詎料三個月前，羅先生的判頭突然失蹤，並拖欠他約兩個月的工資，雖連番追討，仍沒有結果，加上失業率高企，他一直找不到新工作，經濟逐漸陷入困境。
「其實呢幾年，我嗰行都淡咗好多，一個月平均先開得十幾日工，但總叫做有收入，慳慳哋勉強都夠過日子，唔會好似𠵱家咁，完全冇工開，一毫子收入都冇。」四十歲的羅先生歎氣道。
沒有收入，這段日子以來，阿英一家僅靠借貸典當度日，惟目前已到達山窮水盡的地步。「乜嘢親戚朋友，我哋都開口借過，上個月，我連唯一一條金手鏈，當年嘅嫁妝都當埋，先捱到今時今日，但𠵱家真係乜都冇，嚟緊嘅日子都唔知點算。」雙眼泛紅的阿英說。
由於身無長物，連日來，阿英一家僅以廉價瓜菜及稀粥果腹，惹人垂憐，她表示：「食唔飽都事小，𠵱家我哋最怕冇錢交租，交水費、電費，到時被人趕走，幾仔乸就真係要瞓街。」
聽到妻兒訴說憂慮，一直沉默寡言的羅先生禁不住流下男兒淚。「我都好無奈，辛辛苦苦做完嘢，竟然會冇糧出，想轉行，一把年紀又冇人請，𠵱家搞到老婆仔女要同我一齊捱，我真係好心噏。」
蘋果日報慈善基金了解到阿英一家的困境，即時撥款一萬元，助她清還欠租及各項雜費，並應付短暫的生活需要。
捐款編號：C0699
暖流熱線
電話：29908688
傳真：23702192
電郵：
網址：