雷頌德（阿Mark）同方中信兩位圈中型男，最近不約而同獲得意大利名車AlfaRomeo垂青，好似方中信咁，有關方面專誠為佢度身訂做咗一部AlfaRomeo156SportwagonMan1，贊助方中信拍無綫新劇《花樣中年》嘅時候使用。
不過，講到阿Mark重巴閉，馮仁昭聽聞AlfaRomeo想搵佢做香港區嘅代言人之餘，重會搵佢作埋曲，推出一隻AlfaRomeo嘅CD。而近日被傳同張燊悅分咗手嘅阿Mark，最近亦有咗「新歡」，分別係AlfaRomeo嘅147同156GTA，車價方面分別係二十三萬八同四十萬，重記得阿Mark之前一直鍾情於Audi，但最近聽聞佢將手頭上嗰幾部Audi賣晒，改揸Alfa，唔通阿Mark真係送舊迎新？
阿Mark同方中信揸埋同一個牌子嘅車，唔知邊個型啲呢？
舒淇係繼成龍、周潤發和楊紫瓊後，又一位亞洲藝人衝出亞洲，進軍荷李活嘅電影市場，早前拍咗套新戲《玩命快遞》（TheTransporter）。呢套戲預計下個月中喺美國上映，對於自己第一部打入荷李活嘅新戲，好快有得畀人欣賞，佢話：「話晒都係第一套喺荷李活上嘅戲，心情少不免都會有啲緊張啦！」
梁朝偉拍完寰亞嘅《無間道》之後，嘉禾又想搵佢拍谷德昭執導嘅賀歲片，聽聞為咗請偉仔演出，嘉禾畀六百萬片酬搵佢同楊千嬅合作，嘉禾真係勁，𠵱家咁嘅市道重肯畀咁高片酬搵人拍戲，馮仁昭就覺得如果淨係演員費就用咗咁多錢，試問啲製作費又可以剩番幾多呢？好老實講偉仔唔係拍王家衛嘅話，賣埠價值相對冇咁大，所以收呢個價就過高啦！
畫眉小生同佢老婆洗衣粉，成日喺人前扮恩愛，但畫眉小生一向好鍾意喺出面偷食，早排佢同一個圈外女人行得好埋，有人重見到佢喺九龍城一間甜品舖，同個女人撐枱腳食糖水，兩個人各自叫咗兩碗唔同嘅糖水，但食嘅時候就你一啖我一啖，旁邊啲食客見佢兩個咁肉麻，個個睇到眼都凸埋，但畫眉小生連眼尾都唔望吓人，食完嘢之後負責埋單，之後個女人重上埋佢部車一齊走人。睇嚟畫眉小生再係咁，遲早會繼同大頭妹傳緋聞之後，再整多單杰撻撻嘅蘇州屎。
張惠妹早前喺武漢撞車整傷條頸要戴頸箍，休息咗一段短時間，阿妹已經好番，唔使再戴頸箍，重可以開始為下個月十九號喺台灣舉行嘅個唱做宣傳。阿妹好緊張今次個唱，佢特別設計咗個「十全精力餐單」畀自己，但個餐單竟然全部係煎炸嘢同辣嘢，早餐食多士同漢堡包等，午餐食排骨飯加滷蛋、凍鳳爪、香腸、苦瓜炒鹹蛋配奶茶或者橙汁，人哋開個唱通常都節食減肥，阿妹就博命食，真係與別不同。
陳見飛同名模陳嘉容等噚日獲美國品牌TommyHilfiger選為TGirl，佢哋更獲贈五位數字嘅服裝贊助同最新型號手表。陳見飛話早前上《勁歌金曲》表演好緊張，因為係第一次唱現場，搞到手震腳震。跟住佢話前晚去紅館綵排，係第二次唱現場，佢個歌唱老師教佢要捉緊節拍，同收緊屁股啲肌肉，個人行出台都會自信啲喎！