近期唔少相機都推出特別版型號，務求增加收藏價值，其中CONTAX除推出70周年特別版嘅Aria相機外，更改良復刻推出1902年Tessar鏡頭，碰啱Nikon又復刻S3相機嘅黑色型號，瞬即令港日相機界掀起一遍懷舊潮。最值得讚歎係呢批曾叱咤一時嘅相機、鏡頭，喺重新演繹下，比𠵱家唔少新嘅相機更靚，絕對係寶刀未老。
記者：張穎倫 攝影：陳穎
ImageGirl：Don
鳴謝：葉壹堂
喺1958年仍然係RangeFinder取景式相機嘅天下，日本Nikon當年為咗喺德國Leica同CONTAX下殺出重圍，推出了呢部S3相機。憑住特別耐用嘅靈件、硬淨機殼，成功獲得當年攝影界嘅垂青，鞏固咗日本相機喺世界市場嘅地位。當Nikon喺60年代推出單鏡反光機嘅F系列後，S系列便逐漸停產，所以𠵱家想玩取景式嘅Nikon機，同時懷緬叠影對焦嘅情懷，就只可以選擇呢部復刻版S3。
型號：NikonS3LimitedEditionBlack
快門：T-1/1000
取景亮框：35mm、50mm、105mm
體積：W136×H81×D43mm
跟機鏡頭：NIKKOR-S50mm
光圈：f/1.4-f/16
焦距：0.9m-無限遠
售價：$32,000（天祥）
新加內置測光 靚相更易影
除咗外觀完全同舊版一樣外，功能上復刻版更新加機內測光，更加適合現代拍友。配合跟機同時復刻嘅NipponKogakuJapan50mmF1.4鏡頭，除作收藏之餘，要影靚相亦冇問題。
真皮機袋 免費附送
上年銀色S3復刻時，唔少拍友都被呢個真皮相機袋深深吸引，皆因佢設計典雅之餘，皮質亦相當名貴，不過需另加二千幾蚊購買，就有啲唔抵。幸好今次免費附送，更加抵用。
說明書同時復刻
唔少人一見到呢本說明書都覺得極之震撼，事關佢由設計，以至紙質都同1958年嘅一模一樣，甚至連入面示範嘅叔叔都充滿住50年代衣着氣息，夠晒原汁原味。
相片測試 影像銳利
論操作雖然冇𠵱家嘅F系列單鏡機咁快，但S3嘅相片質素就相當之高，無論影人定影景都非常銳利，特別喺面相嘅色彩方面更表現得非常出色，確實係令人懷念嘅取景式相機。
小記點睇
上年復刻嘅銀色版已經俾人掃得七七八八，𠵱家輪到更加經典嘅黑色型號，而且更搵番幾十年前曾參與呢部機製作嘅經驗老師傅，一手一腳以人手製造，做功絕非今時今日以機械大量生產嘅新相機可比。最特別係由鏡頭字樣、品牌Logo、真皮機套，以至說明書都同四十幾年前一樣，再加埋全球只限量生產2000部，確係值得珍藏。
呢部Aria相機，係為紀念CONTAX70周年同Tessar鏡頭誕生100周年，而推出嘅特別版套裝。重點在於今次Aria採用銀色機身設計，有別於大部份CONTAX單鏡機都以黑色為主嘅慣例，金屬感非常之強，喺日本更非常哄動，配以小巧機身，同快速自動對焦，無論新手定高手都一樣得心應手，話咁快就影到靚相。
型號：CONTAXAria70Years
快門：16-1/4000
菲林速度：ISO6-6400
體積：W137×H92.5×D53.5mm
跟機鏡頭：CarlZeissTessarT＊45mm100Jahre
光圈：f/2.8-f/22
焦距：0.6m-無限遠
售價：$6,800（萬成）
「鷹之眼」屹立不倒100年
今時今日世界聞名嘅蔡司Tessar鏡頭，原來已經發展咗100年。當年Rudolph博士為咗製造一支結構簡單嘅鏡頭，於是就利用四片三組形式，設計咗第一支CarlZeissTessar鏡頭。拍攝效果竟可同時有齊高解像力、高反差和極小變形嘅優點，瞬即獲得「鷹之眼」美譽。100年來不少廠商，都係模仿呢種設計，從而令Tessar成為鏡頭中嘅典範。
70周年代表
機身正面刻有70周年字樣，唔單止睇落更威，而且慣例二手價比普通版貴一倍，絕對厲害！60周年嘅時候由S2肩負紀念型號嘅代表，10年之後則交由Aria負責，連最新嘅NX都未有呢個資格。
美中不足日本製造
鏡頭上用德文刻上100周年字樣，雖然可以突顯鏡頭中嘅經典，但改由日本製造，就不及100年前德國製造咁原汁原味。
小記點睇
鏡頭加咗100年前冇嘅頂級T*塗膜，原有嘅49mm濾鏡亦改成46mm，可以同CONTAXG系列相機共用，重量亦增加5g。透鏡反射嘅問題更減到最少，名氣同實力一樣咁犀利。
最初嘅相機都係好似喺電影《黃飛鴻》入面，十三姨用嗰啲大木箱相機，牛龜咁大部使用時極之唔方便。於是Leica喺1913年就發明咗35-mm格式嘅相機“Ur-Leica”，可以用我哋今時今日最常見嘅菲林，不過體積都未算好細。直至累積10年經驗之後，Leica終於推出一部可以放喺衫袋嘅小巧相機“LeicaO-Series”。由呢部機開始，我哋用嘅相機先唔使推住個箱周圍走，而35-mm菲林亦沿用到𠵱家，可見對後世影響非常深遠。
型號：LeicaO
鏡頭：LeitzAnastigmat50mmf/3.5
快門：B-1/500
焦距：1m-無限遠
體積：W133×H65×D39mm
售價：$18,000（天祥）
拉出鏡頭最有風味
80年前生產嘅LeicaO原來已經可以將鏡頭收回機身內，喺嗰個年代絕對係劃時代設計。不過佢就冇𠵱家嘅傻瓜機咁厲害可以電動開關，而係用手慢慢拎出，特別有風味。
相片測試 影景都唔錯
攝記喺不斷嘗試下先拍到呢張相片，佢嘅估焦實在相當難對，命中率大概係2，影人就全部“OutFocus”。不過影景嘅質素又確實唔錯，無論深淺色嘅樹葉都層次分明，還原度極高。
小記點睇
整部機嘅設計、質料都同當年一模一樣，美中不足係當年嘅相機操作比較複雜，選用估焦設計，要影靚相的確唔易，所以小記認為佢適合收藏，多過真正拍攝。
售賣點
天祥攝影器材（27221265）
尖沙嘴彌敦道100號東英大廈G26-G28號地舖
萬成攝影器材（23962996）
旺角通菜街106號地舖