好似馬騮王成日變身嘅長實趙國雄，噚日同新加坡美食集團Kopitiam老細陳閃鑫簽完紅磡國際都會商場美食坊租約後，就即刻變身大廚，同陳生一齊表演煎潮州粿廚技。
噚日朝至臨急練吓嘅老趙，煎到手忙腳亂，重將啲韮菜粿煎到爛溶溶，上碟時啲油重係咁滴，愛瘦嘅靚女記者即刻彈開幾呎，驚「盛情難卻」要硬啃嘛。反觀陳生就滋油淡定得多嘞。陳生話，Kopitiam係由福建話譯音，即咖啡店咁解。
今次係該公司第一次嚟香港發展，其實同長實都傾咗兩年，最後才決定租國際都會個場。會花一千萬做裝修，售賣東南亞食物同本港道地食品。公司重打算喺未來一年再多開兩至三間呢類美食坊。
另外，老趙爆佢七十年代在美國讀書時，喺首都間唐人餐館打過兩年暑期工，就已經儲咗七八千美金，用嚟做首期，買咗個美孚新邨七期800呎單位。點解咁好搵？原來佢話當時表現好，冧掂咗老闆娘，好快就由廚房調去做樓面，淨收下欄都肥仔水啦！
住宅樓盤不斷要有新搞作先可以引起買家注意，達到促銷目的，由中原地產代理嘅元朗蝶翠峰，喺中秋節舉辦「蝶影照嫦娥」攝影比賽，今日頒獎。中記已經急不及待再搞第二個宣傳攻勢，一樣係好應節——送臘腸。
今個周末凡參觀示範單位嘅市民，都有機會獲贈臘腸一盒，由正午十二點到六點，每兩個鐘會抽一次獎，每次送出十盒臘腸，每盒價值六十蚊。
中原周子立話，過去嘅周末，蝶翠峰再賣出四個單位，前日又賣出十座低層F室，面積632呎，成交價140.3萬，每呎2220蚊，買家係同區換樓客。現時由中原售出嘅蝶翠峰單位累計有九十四個。
今期新盤焦點落喺深井碧堤半島，開放示範單位以來，售樓處對開空地，一直是經紀新戰場，沿途擺滿各代理行地檔，方便隨時隨地隨街捉客。
噚日現場又發生代理碰撞事件，聽講又搞到報差館收場。
有現場目擊者就話，一對年輕夫婦去睇樓，各自接到來自中原同另一代理行嘅卡片，兩人商量後，決定揀中原。另一代理不甘心，沿途不斷騷擾個客同中記代理，最後重聯同數名夥計，打中原代理。
中山星晨花園為慶祝發展十周年，喺中秋節搞大型嘉年華會，差唔多有一萬人出席，當日有解放軍表演跳傘，上海中樂團演奏音樂等一連串活動。
原來市政府都有出手協助，調動二百幾個公安同交通警，到場加強保安同協助維持秩序。
聽講發展商搞呢個活動，總共使咗超過六十萬。而優惠期內半價賣嘅孖屋，一座都係四十五萬起咋。
地產代理行業近年變化好大，代理行惟有不斷變陣，鴻運地產更首次擢升員工做營業董事，聽講係公司成立二十年嚟第一次。
鴻運共升咗，沈國智、潘漢雲同劉志傑三個區域經理做營業董事，分別掌管香港、九龍同新界區。沈國智加入鴻運已有十年，其餘兩人都有七年，夠晒經驗。另外，同期有十個分行經理晉升為區域經理。
鴻運董事局一直都係得田國強同佢太太沈國芳兩個人，今次提升員工後就有五個。睇嚟田生應該滿肚大計，準備大搞，先至有咁嘅部署，詳情今日揭曉。
對於鴻運嘅新部署，相信同行最關心，分分鐘會影響到自己嗰瓣，結果變成大家都要齊齊變陣。
新世界發展嘅太子道細碼盤別樹華軒，前日開放示範單位畀公眾參觀，但一直未公布價單，神神秘秘，等想買嘅又唔知價錢，代理就更加急如熱鍋上嘅螞蟻。
唔知係咪群情洶湧，發展商噚晚漏夜出價單，不過只係得丸樓單位。
市場即時錄得八宗成交，包括最細碼嘅十樓G室，366呎賣咗109.8萬，每呎3000蚊，同埋最大碼嘅十五樓A，590呎成咗197.7萬，每呎3351蚊，個價比起市場之前估計嘅略高，發展商呢招果然使得。
蘭西
電郵地址：