如果沒解讀錯葉太，基本法23條，只關乎極少數極少數一小撮一小撮、企圖嚴重危害、分裂、顛覆國家的暴徒的宿命。暴徒踩中23條的地雷，U-turn走入不歸死路，付出沉重代價，是暴徒的必然下場，是政府鎮壓的必然措施。
普通市民，暴肥暴瘦冇問題，只要不做暴徒，就得相信保安局長。記者招待會中，立立令掛在她心口上的不是奶茶，而係大大粒珍珠，是不是巧合地有23顆，是不值得你和我憂慮的議題。因為，照保安局長講，你和我都是普通市民，干犯23條叛國罪的機會，非常非常之低。（希望你不會戇居居，盯實葉太條珠鏈，獨鯁碟頭濕飯！）低到雖然未至零，無論如何，應該低過董特首的B！市民大眾，還有甚麼放心不下的呢？
叛國罪確係比較嚇人。叛國，不是拌麵，涼叛熱撈一樣死。希望23條一通過，上海小吃店馬上取締引人誤會的涼拌頭盤。砵蘭街硬銷「陪網良伴」只需$10一粒鐘的架步，小心惡警突襲清場。一向以為警司只叻殺雞一瓣的人注意了，23條通過後，警司殺上門的能力無限伸延，到時一頸血的，除了走地雞，還有揸雞都無力、橫睇掂睇甚至打斜睇，都不像分裂國家、煽動布殊唔打伊拉克、鼓吹叫他打北京的你！「雞本法23條」一落實，雞毛鴨血，渣都無剩。市民只要聽話食長齋，置身雞屎外，包保冇事。係咪咁話葉太？