某電影公司有意搞一齣性喜劇，就此刮小妹來作research。似乎是「性」出個朵來，非我識你係老鼠。坦白講，我跟你三九唔識七，我也會寫電影劇本，做乜要益你。「找我寫還可以考慮，提供資料就免了。」我表明立場。「寫又好，research又好，點都要嚟傾一傾。」聯絡人說。拉鋸一輪，最後對方撻朵，噢，原來是某大名頂頂點我名。既然拋出佢個大名，我也就走左轉畀面派對。
如此的一個局，大名頂頂蒲過下頭，握過手就閃。我依着他掌心的餘溫，熬了兩個鐘。好幾日後，聯絡人再掛來電話：「佢（大名頂頂）今晚得閒，想你來再傾。」那時日落西山，真係拉屎都嫌遲，我說：「輪到我唔得閒。」硬食一次是人在江湖，硬食兩次就是愚。唔係唔想撈，係撈唔落手。
反之，某導演就靚仔多了，他亦差唔多時間掛來電話，問我有冇興趣當他project的編劇，均真的提出合作條件，一句到尾，清楚，奈何價錢是我收開的四分一，惟推，他知價後，歉疚的一句：「對唔住，我唔係有心侮辱你……」反而有好窩心的感覺。事後在酒吧撞到，我們還是一貫的猜枚、賜毒酒，行走江湖。
請記住，尊重永遠是一面鏡子，就算係老鼠。
（編按：康妮續稿未到，暫停一天。）
容雅慧