恩浩雲喺歐冠盃輸到咁勁，除咗因為阿仙奴好弗外，佢哋嘅教練軒迪克同樣要負上調兵遣將錯誤嘅責任；因為佢開賽二十七分鐘就將失第一球嘅罪人防守中場禾高調出，由十七歲靚仔李安度入替，結果搞到中尹邦美吃力不討好，而經驗有限嘅李安度亦因中場甩拖，搞到失埋第二球而大勢已去。
計我求大俠話，軒迪克雖然教到南韓喺世界盃識飛，但南韓球員始終同恩浩雲球員有別，至少恩浩雲球員落到場份鬥志就同「南韓仔」爭一「橛」，最重要梗係……球證冇偏幫之心，所以軒迪克或者可以令恩浩雲稱霸荷甲聯，但係歐冠盃就真係爭啲喇。
英超聯係英雄地，冇料領隊隨時係咁先，但係亦有例外，好似𠵱家喺聯賽尾二嘅新特蘭咁，佢哋主席梅利喺球隊上周六淨吞紐卡素兩蛋後，立即叫領隊列特唞幾日，冷靜一下，至周六迎戰維拉前先至好番嚟帶隊。我求大俠就話咁有人情味嘅老細去邊到搵，所以如果周六新特蘭有乜不測，列特你自己重好唔好意思留低呀？
所謂夫唱婦隨，朗拿度老婆美蓮妮雖然好唔情願，仍然跟住老公去到馬德里落班；但係就唔係先前所講嘅馬德里體育會，而係被同市另一間規模較細嘅華歷簡奴攔途截劫咗去，而且重喺當地時間周四晚首度亮相，對手就正正係馬德里體育會，夠晒睇頭啩。相比起重未有得落場嘅老公，美蓮妮今次遲嚟先上岸，可以威番次喇。
周中歐冠盃戰火連天，重鬼有人理意大利盃首圈首回合嘅戰果咩！上屆冠軍帕爾馬連同另外三支意甲隊阿特蘭大、烏甸尼斯同埋科木齊齊輸畀乙組隊，帕爾馬重淨吞維琴察雙蛋。呢啲戰果再次反映意大利盃嘅存在價值好細。老實講，𠵱家有太多途徑踢歐洲賽嘞，辛苦攞個意大利盃冠軍踢足協盃，呢條路又真係唔抵行。
皇馬對亨克場歐冠盃分組賽冇電視直播，所以睇唔到皇馬無施丹同朗拿度在陣都依然狂數六球。我求大俠都覺得呢支歐洲班霸氣勢之強認真得人驚，任何對手呢一刻對住佢哋都好似遇到白色恐怖一樣。重有，皇馬開季讓幾多球都場場贏波贏盤，睇嚟下場作客AEK雅典都唔會讓得少過兩球半啩！