今屆沙龍網賽連續兩日受天雨影響，到噚日終於停雨，對賽會嚟講就絕對係好消息，如期完成晒所有首圈嘅單打賽事，今日就會進行次圈同八強嘅比賽；咁對晉級嘅球員嚟講，一日打兩場波可能會比較辛苦，但球迷買一張飛就可以睇足咁多場波，就真係超值喇！
好可能最後一次參加沙龍網賽嘅張德培，雖然近年成績麻麻，人氣滑落，但佢喺香港始終都有番咁上下吸引力，所以有唔少球迷捧場，入座率即刻回升；整日平均有五成觀眾，現場氣氛相當熾熱，可惜「培哥」最終力戰下都輸畀哥里查，以輸波同球迷講拜拜。
泰國球手斯里查潘噚晚爆冷輸畀美國鄧特出局，而第二盤就發生咗段小插曲，鄧特喺第十局領先三十比十五時，斯里查潘打失球波，佢就以為自己輸咗呢局，行番去休息時至知只係落後十五比四十，擺咗個大烏龍，佢最後重反勝呢局㖭。