世界盃之後，又有亞運，雖然釜山市面唔算熱鬧，但始終有好多外國記者採訪，當地酒店又有一個掠水良機。
好似小記下榻嘅Motel（汽車旅館），雖然有釜山組委會推薦，但格局同九龍塘嘅「情侶酒店」一模一樣，大堂簡陋唔在講，一切現代化設施欠奉；只係有三級片出租，但唔好以為「一分錢一分貨」，房租每晚九十一美金（約七百港元），喺香港住四星級酒店都得啦，釜山組委會真係「冇好介紹」！
相反，當地人就好熱情，好似新聞中心嘅中英文義務繙譯，雖然外語能力「有限公司」，但就耐心咁幫小記，用熱誠搭夠。而的士司機重好人，雖然有啲比賽場地同酒店唔識去，但佢哋出盡辦法，好似車去新聞中心或者警局問路；更為表歉意，重自動減收一成車費，咁嘅服務態度實在值得表揚。