第一天然食品（1076）前日公布中期業績，盈利勁升92％，但股價就倒跌，噚日回升5.9%，收54仙，交投較前活躍，成交金額443萬元，似想逆市出擊。
經紀陳話，呢隻股上市7個月，已經有個主要股東減持5千萬股，以現時股價計，市值2千幾萬元。根據佢嘅專業判斷，批貨應該係落入炒家手上，稍後會將股價舞高，然後再派出街。
小初心諗，若係舊年民企股當旺之時，第一天然夠晒條件炒作，佢賣急凍食品，盈利同增長速度真係正到你唔信，情況有多少似超大現代（682）同浩倫農科（1073），實際上第一天然嘅幕後搞手，亦同呢兩隻股有莫大關連，實力不用懷疑。
可惜近排證券界一聽到民企兩字即刻色變，好似近排最強勢嘅比亞迪（1211）整單官司出嚟，股價即刻嚇到腳仔軟，大跌11%，真係唔知第一天然班炒家，今次點樣化腐朽為神奇。
慕容小初